الخميس، 24 فبراير 2011
الثلاثاء، 22 فبراير 2011
أشكو إلى الله
تعالى الله الذي قصم الجبابرة والمتكبرين
وقطع دابر
الفراعنة والمستهزئين
وضرب الذلة على الطغاة والمتمردين
ما أسرع نزول بطشك
الشديد وما أسرع حلول قهرك المجيد
بكل جبار عنيد .......شيطان مريد
بغى على
العباد وطغى في البلاد
وسعى فيها بالفساد
اللهم
أنصر أخواننا في ليبيــــــا
على الطاغية القذافي و أعوانه
اللهم
أهزمهم فأنهم يقتلون أخواننا العزل
اللهم
أقذف الرعب في قلوبهم
و فرق جمعهم
وشتت شملهم
اللهم
أجعلهم إلى الظلمة يعمهون
وعلى الذلة يُفتنون
ومن النعمة يُحرمون
ولا يستقيمون سراً ولا جهراً
ولا يستطيعون نصراً ولا صبراً
الاثنين، 14 فبراير 2011
حكاية العمر كله
أعتقد أن يوم الجمعة 11-2-2011
يوم لن يمحى من ذاكرة أي مصري
أخيرا قدر الله لنا أن نتنفس الحريه
وان نعيش يوماً نحلم فيه بغدٍ مشرق
نتنفس فيه نسمات الحرية والكرامة
أعتقد أن التاريخ سوف يسطر أيام ثورة الحرية في كتب
وسوف يخصص كتاب منفرد ليوم الجمعة
أنا هحيكلكم عليه من تجربتي الشخصية
دخلت ميدان التحرير الساعة 9 صباحاً
الناس بدأت تتجمع والمظاهرات أشتغلت
بدأت صلاة الجمعة
ومعها بدأ أروع شئ في اليوم يحدث
الشيخ جبريل بدأ الدعاء
يااااااااااااااااااااااااااااااااااه
أقسم بالله لو كان حجر لكان أنهار
الأرض كانت بتترج من تحتي
كنا بنُأمن خلفه بأعلى صوت
مشهد رائع كنت حاسه أن قلبي هيقف من الخوف والفرحة
وبعد الصلاة رجعت المظاهرات مرة تانيه
أول حاجه كان أي شخص يلاحظها في وجوة الناس
الأصرار والعزيمة
شيخ كبير كان بيقول
هيمشي النهارده يعني هيمشي
خلااااااااااااااااااااااص معندوش فرصة تانيه
كل ما أروح في مكان
مسمعش غير الناس بتقول هيمشي النهاردة
كله كان بيرفع علم مصر
وكله كان بيردد
تحيا مصر ..... تحيا مصر
ساعة ورا التانيه عديت
وبعدييييييييييييييين
أروع خطاااااااااااااااب في التاريخ
يا الله يا الله يا الله
دموع وفرحة وضحك وصريخ
محدش أستنى أن الخطاب يخلص
كله كان بيهتف تحيا مصر .... حرية.....تحيا مصر
أنتصرنــــــــــــــــــــا
أنتصرنــــــــــــــــــــا
الناس كلها كأنها ولدت من جديد
أنا هقول حاجه تضحك
أنا كان معايه ناس كبار في السن
لما نظرت لوجههم حسيت أنهم صغروا
وخدودهم بقى لونها وردي
وعيونهم فتحت بعد ماكانت قفلتها هموم السنين
أروع لحظة عشتها في حياتي
وأعتقد أنها أصدق دموع نزلت من عيوني
كانت في اللحظه دي
وأول مرة أحس بفخر أني مصرية
أنتمي لهذا الشعب وهذه الأرض
قعدت ساعات بحتفل مع كل المصريين في التحرير
أحتفل معاهم برجوع الحرية والكرامة والعزة لينا
والأهم رجوع بلدنا تاني لينا
بعد ما كان سرقوها مننا
أروع لحظة عشتها في حياتي
وأعتقد أنها أصدق دموع نزلت من عيوني
كانت في اللحظه دي
وأول مرة أحس بفخر أني مصرية
أنتمي لهذا الشعب وهذه الأرض
قعدت ساعات بحتفل مع كل المصريين في التحرير
أحتفل معاهم برجوع الحرية والكرامة والعزة لينا
والأهم رجوع بلدنا تاني لينا
بعد ما كان سرقوها مننا
ياااااااااااااااااااااااااااااه
شكرا سيادة الرئيس أنك أخيراً أخيراً
قدمت مصلحة مصـــــــــــــــر
{ بعد ما خربتها أنت وأعوانك وزودت الخراب بعنادك الأيام الي فاتت }
فوق مصلحة أي فرد
{ ولو أني عارفه أنه غصب عنك وأنها طالعه من نني عنيك }
في 18 يوم الي فاتوا أتعرفت على ناس كتيييييييييييييييييييير رائعه
وأتعلمت منهم كتيييييييييييييير أوي
أكتشفت جدعنة وأصالة الشعب المصري بنفسي
وعرفت أنها حقيقه مش مجرد كلام كان بيتقال
عايزة أشكر ناس كتير
أولهم والدتي الرائعة
الي مسبتنيش ولا يوم أنزل لوحدي إلا وهي كانت قبلي
خطيبي
الي كان عامل زي سترة الحماية والأمان
أصدقائي وزميلي في الشغل
لأنهم أصروا أننا كلنا نبقى أيد واحده
ومحدش خلف فيهم الوعد
صاحب الشركة الي بشتغل فيها
الي قدم مصلحة بلده على مصلحتة الشخصية
وأمر بأننا لن نعود الي العمل الا في عهد نظام جديد
وكان أول واحد بينزل فينا
الشهداء
بشكر كل شهيد على تضحيته بدمه كثمن لبلده
وبقوله أنت أعظم وأجمل ما في الثورة
وبعتذر لأهلهم وبتمنى أن أصرارنا يكون عوضهم ولو بالقليل
بشكر كل مصري شريف شارك في مظاهرات الحرية
بنفسه أو بقلبه او بدعائه
وأولاً وأخيراً بشكر الله تعالى
لأنه لولا توفيق الله ماكنا لنحصل على الحريه
ونسقط رأس الفساد
الجمعة، 11 فبراير 2011
الخميس، 10 فبراير 2011
ياجبااااااااااااار
أنا بكره هصلي الجمعة في التحرير
خلاص ملهاش حل تاني
الله عليك يا جبااااااااااااااااااااااار
الله عليك ياقوووووووووي
ربنا يحرق دمك يا شيخ
ربنا يحرق دمك
صمت دهراً ونطق كفراً
ده انت مفيش زيك والله
أيه ده
أيه الجبروت والقوه دي
أتعلمتها فين
هقولك أيه
ربنا أقوى وأعظم منك
هو القادر على أنه يذلك ويخدلنا حقنا
أيه ده
أيه الجبروت والقوه دي
أتعلمتها فين
هقولك أيه
ربنا أقوى وأعظم منك
هو القادر على أنه يذلك ويخدلنا حقنا
مفيش كلام تاني
حسبي الله ونعمة الوكيل
حسبي الله ونعمة الوكيل
الأحد، 6 فبراير 2011
أنا المصري
يارب تمطر طوب ونار على الفاسدين والطغاة
أما أحنا الشباب الي بيعمر البلد
والي بيحبها وعايز يرفع من شأنها
يارب تمطر علينا ورد وياسمين
ونصر ورحمة من عند الله
أنا فعلا كنت محبطة وحاسه بقهر من كلام الناس الي بسمعه
ومحاولتهم تسفيه الي أتحقق
ولكن أنا بعتذر لأروع شباب في مصر
شباب التحرير
وبقولهم أثبتوا الله معنا وسوف ينصرنا
وأنا هرجع تاني علشان خاطر بلدي
ومش هيأثر فيه كلام أي حد تاني
مصر لازم تبقى حره
ولازم الطاغيه ده يمشي منها
أنتوا كنتوا فاكرين الثورة إيه !!؟
لكل مصري خايف علي المام بتاعه لحسن يجوع
أنتوا كنتوا فاكرين الثورة إيه !!؟
مشوارين
ثلاثة للتحرير والنظام ينهار !!
دم الشهداء والجرحى وحق من تم اعتقالهم واهانتهم
مش في رقاب القتلة فقط
بل أيضا في رقاب المتخاذلين والمتراجعين
فوقوا بقي كفاية ظلم
السبت، 5 فبراير 2011
يارب تمطر طوب
يارب تمطر طوب على العيال في التحرير
الدعوه دي سمعتها النهارده من واحده ماشيه في الشارع
ست كبيره وشكلها من الطبقه الفقيره
حسيت أنها بتتهمنا أننا السبب في الغلب الي هي فيه
وأننا السبب في أنها مش لآقيه تاكل
حسيت وقتها بإحباط شديد
حسيت أن بهدلت الأيام الي فاتت
والي كنت بقول فيها لنفسي كله يهون علشان بلدي
حسيت وقتها أن ده كله ضاع هدر
وحسيت أن في نسبة كبيرة من الشعب ده
خســـــــــــــــــــــــــارة فيه
كل نقطة دم والبهدلة الي أتعملت علشانهم
دلوقتي وبأعلى صوت أنا الي بقول للشباب في التحرير
أنا كنت وسطكم بس أنا رجعت بيتي
وياريت أنتم كمان تمشوا وترجعوا لبيوتكم
في أحضان أمهاتكم وتناموا تحت بطاطينكم
لأنكم بجد خسارة في الشعب ده
لأنه شعب كلمة توديه وكلمة تجيبه
أرجعوا لأن دمكم الي هيسيل مش هيكون ليه أي ثمن
وهتطلعوا في الأخر شباب متهور وعايز يخرب البلد
وبقول للطاغيه مبارك
خليك معانا
خليك معانا
والنبي أوعى تمشي يا أخي
خليك معانا
على قلبنا طول العمر
خليك معانا
على قلبنا طول العمر
أنت تستاهلنا وأحنا منستهلش غيرك
خليك معانا
لأننا من غيرك هنضيع ونجوع
ومش هنعرف للأمان طريق
وبقول للشعب التونسي تحية كبيره أوي ليكم
علشان أنتم فعلا الأبطال الحقيقيين
صمدتم شهرا كاملا على قلب رجل واحد وحققتم ما تمنيتم
وأخيرا
بقول لكل شهيد سقط مننا الأيام الماضية
أنا أسفـــــــــــــــــه جدا
لأنك مت وضحيت بنفسك علشان الشعب ده
الأربعاء، 2 فبراير 2011
أرحل يا ظالم
حسبي الله ونعمه الوكيل
ربنا ينتقم من مبارك وأعوانه
ربنا يذلهم ..الفاسدين ..الظالمين
كنت فاكره أن الي عشته يوم الجمعه
من بداية اليوم هيكون أصعب حاجه تمر عليه في حياتي
ضرب وأهانه نالني منها الكثير
رصاص وقنابل ودم في كل مكان
كأننا في حرب..مش في بلد متحضر
ولكن الي عشته النهارده في التحرير
أمام البلطجية من مؤيدي مبارك
أمام البلطجية من مؤيدي مبارك
ملوش أي وصف
الرعب بعينه..أعتقد أن الكلمه دي بسيطه جدا
أول مره في حياتي أدعي على حد بالشكل وبالكره ده
أرتاح خلاص لما ولع في البلد
بقالنا أسبوع بنتظاهر
محصلش أي مشاكل غير مع الأمن
ولكن المصريين محصلش حاجه مابينهم
أرتاح خلاص لما فرق بينا
لازم يرحل ويتحاكم هو وكل عصابته
هو السبب في كل الخراب الي حصل في البلد
لازم يمشي خلااااااااااااااص ملوش مكان معانا
وأذا كان فاكر أن بخطابه الي مليان كدب
أمبارح هيهدينا
لألألألألأ
لازم يرحل
مش ممكن هو يعيش
ويسيب شعب كامل يموت في نفسه
ربنا أكبر وأعظم منه
وأن شاء الله يأخذوه أخذ عزيز مقتدر
الاشتراك في:
الرسائل (Atom)