الخميس، 25 فبراير، 2010

رئيس تحرير يستحق الخنق

الأسم : محمد مصطفى البرادعي
السن :68 سنة 17/6/1942
الوظيفة : المدير السابق للوكالة الدولية للطاقة الذرية ورئيس جبهة التغيير والأصلاح الدستوري
ويعتزم الترشيح لمنصب رئاسة جمهورية مصر العربية في الأنتخابات القادمة 2011
" وهو حق يكفله القانون لكافة الأفراد الذين تنطبق عليهم الشروط اللازمة "
"وأعتقد انها بتتوفر فيها وبالقوي كمان "

الأيام الي فاتت كان في كلام كتيييييييير عن د / البرادعي


وخصوصا عن يوم وصولة لمصر
يوم 19/2/2010 وأستقبال آلاف الناس "الزهقانين - الأرفانين - المخنوقين - الي عايزين يغيروا بلدهم "
وبكررها تاني كانوا آلاف مش زي ما بيقول بعض الجهلة المئات
وفعلا إتحولت صالة 3 في مطار القاهرة الي ساحة كرنفال أعلام وصور البرادعي وشعارات تأييد
كان في ناس كتير من العامه والسياسيين والأعلاميين وغيرهم 
( حمدي قنديل / علاء الأسواني / حسن نافعه / المستشار محمود الخضيري / جميلة اسماعيل / جورج اسحاق / الفنان خالد أبو النجا )
وكل الناس دي جت علشان تؤيد مبادرة التغيير
وتعديل الدستور 
لما تبص في وششهم تحس ان لسه الأمل موجود
وبعد ده كله
أذ أفاجئ النهارده الصبح بمقالة في جريدة الجمهوريه 
للأستاذ / محمد على ابراهيم رئيس التحرير 
عنوانها : مشكلات البحث عن بديل افتراضي 
بيتكلم طبعا من عنوانها عن د / البرادعي 
بس بجد أقل ما يمكن أنه يتقال على المقاله دي " سلة قمامة "
وعن الكاتب " الي ملهمش فيها بيكتبوا عن البرادعي و أحنا مش معاهم "

مش هتكلم عن المقاله كلها لأن الكلام يطول فيها 
علشان هو بيعتمد فيها على التطاول والتجريح والسب 
تحس أن هو معين نفسه محامي عن الحكومة وأنه حامي الحمى وهو أكبر منافق 
ما علينا أنا بقى كل الي غايظني الي كتبه على د / البرادعي 
في حد المفروض أنه صحفي محترم  يتكلم عن عالم كبير وبقيمة د / البرادعي كده
وحتى لو أختلف معاه في الرأي 
كاتب بالحرف الواحد ( أستاذ البرادعي يتهته ولغته نمطية وخفت دم المصريين غابت عنه )

هو ده المقياس بتاعك لتقييم الشخصية 

رجل حكيم عاقل فذ حاصل على جائزة نوبل مواطن مصري متميز
يحمل عمرا من الأنجازات وسنوات من الكفاح 
مثال للأجتهاد وإتقان العمل والدقه 
يكون عيبه الي تتكلم عنه هو التهته وغياب خفة الدم 
" ماهو خلهالك "
ايه التفاهه والسطحيه دي كل ده حقد وغيظ من الراجل علشان عايز يغير حاجه هي في الأساس غلط
لدرجة انك مش لاقي حاجه تعيبه بيها غير التفاهات دي 
أتقي الله يا أخي 

فعلا ( لكل داء دواء يستطب به إلا الحماقة أعيت من يداويها )
ان مش مع البرادعي أو غيره
انا مع الي يغير البلد ويتقدم بيها للأحسن ويطور منها
ويوفر أساسيات الحياة الكريمة للمواطن 
وأهم الأساسيات دي هي 
الكرامة
نفسي ترجع لحسن أحنا بدأنا نسنى يعني أيه كرامه
أنا مع اي حد هيخلي بلدي دي أحسن بلاد العالم 
لأنها فعلا أحسن بلاد العالم وشعبها أجمل وأطيب وأكرم شعب 
مصر تستحق فعلا كده
وفي النهايه 
اللهم لا تسلط علينا من لايخافك ولا يرحمنا

الأربعاء، 17 فبراير، 2010

أستاذ ولاء صادم عفوا علاء صادق





أنا مش عارفه أقول أيه عن الشخص الغريب العجيب الي أسمه ولاء صادم .... عفوا


علاء صادق
نفسي أعرف الراجل ده عايز ايه كل ما يلاقي الناس فرحانه ومبسوطه من حاجه أو من شخص معين
تحس أنه مش قاعد على بعضه وكأنه بيصعب عليه يشوف الناس مبسوطه
أيام كأس القارات في جنوب أفريقيا وبعد ماتش مصر وأمريكا مسك حسن شحاته واللاعبيين ومسح بيهم الأرض
(طبعا بلغته الفظيعه المريعه الشنيعه وطريقة كلامه المستفزه )

وقال استحالى نوصل كأس العالم بالمستوى الضعيف ده للاعبين وقال ان حسن شحاته بيكسب بالحظ وبدعاء المصريين ليه وتيت تيت تيت
كلام في أي حاجه وكلام ملوش معناه
المهم بعد ماتش مصر والجزائر 2/0 في القاهره يوم 14/11/2009
كان قلبه هيوقف من الفرحه وقاعد يوصف في عبقريه منتخب مصر جهاز ولاعبين والمدح الي على أصوله والكلام الجميل
وان احنا الي علمنا البرازيل الكوره وتيت تيت تيت برضه
وكتب مقاله طويله عريضه تطلع منها بسطرين تلاته ان احنا هنفوز بالماتش الفاصل طبعا حسب الأرقام والمقاييس
وكأنه عراف أو بيقرأ الكف ...... وطبعا خسرنا
فين بعدها الأستاذ ........ أختفى فص ملح وداب
طبعا بعد ما الناس نسيت الماتش والي حصل فيه ظهر الأستاذ الهمام تاني
وهيعمل ايه علشان يخلي الناس تتبعه تاني
يتكلم في كأس الأمم الأفريقيه أنجولا 2010
وبدأ التشاؤم والكلام الي ملوش معناه تاني والحمد لله للمره المليون ربنا يكسفه ونكسب البطوله
وأحمد حسن يرف الكأس عاليا ...........يارب دايما منصورين رغم حقد الحاقدين
ازاي طيب ينكد علينا معقول نفضل فرحانيين أهو ده الي لايمكن يحصل أبداااااااااااااااااااااااا

مسك حسن شحاته وقاعد يقلل من قدراته وان الشعب المصري قاعد ينفخ فيه لحد ما هنحوله لإله

وان العرض النيجيري لتوالي حسن شحاته تدريب منتخبهم في كأس العالم كذب في كذب
وسبحان الله طلعلوا معارف في نيجيريا وسألهم وأكدولوا انهم أول مره يسمعوا الكلام ده
يا سبحااااااااااااااااااااااااااان الله ياشيخ
والله انا مش عارف أقول عليه أيه ولا أيه وهو كل العبر في
طبيب فاشل / حكم فاشل / مذيع فاشل فاشل فاشل
أستاذ في التطاول والتجريح ومبيسبش حد في حاله
بيعتمد في برامجه السخيفه على الشعلاله والتسخين
معندوش مشكله أنه يتطاول باللألفاظ على الناس على الهواء ولا كأن في ناس محترمه بتتفرج
وكلوا كوم ولما أعلن استقالته على الهواء مباشرة كوم تاني كان مسخره
قولت الحمد لله هنرتاح منه ولكن للأسف بدل البرنامج الواحد بقوا أتنين
عموما في النهاية
ربنا يبعدوا عننا ياااااااااااااااااارب
وطاب مساؤكم

السبت، 13 فبراير، 2010

الحياة بقى لونها أحمر ... أحمر أحمر أحمر

هو أيه الي جرى للناس في مصر كل حاجه في حياتنا أستيراد من الخارج مش كفايه علينا الأجهزه - الفوانيس - السجاجيد - الأكل كماااااااااااااااااااان الأعياد عيد الحبكان ناقصنا العيد ده كمان حاجه جديده علينا من كام سنه بس حاجه بجد تقرف
اليوم ده استحالى انزل الشارع بحس ان عيني بتتلوث من المناظر الي بشوفها
وكولوا كوم والي كان بيحصل في الجامعة كوم تاني تحس انك في ملهى ليلي مش حرم جامعي محترم اليوم ده لو نزيلت الشارع تحس انك في مستنقع دم " ايوه مستنقع لان المنظر يوجع العين "

محلات الورد معندهاش غير الورد الأحمر وممكن أبيض بس الألوان التانيه ممنوع


محلات الهدايا ياعيني ياعيني الدباديب الحمراء في كل مكان مرميه يمين وشمال
كأن الدبدوب هو معنى الحب
البنات بقى حدث ولا حرج كأنك نزلتهم في برميل دهان أحمر وطلعتهم منه
وكل وحده دهنه شفايفها بروووووووووج أحمر تقولش دراكولا

أما بقى الكورنيش فا الي عايز يحرق دمه يروح عليه ويتفرج على المناظر الي هناك

ليه كده هو احنا محروميين من الحب طول السنه؟
ايه الي حصل في بلدنا ؟


مجرد تقليد اعمى
بس تقول ايه لاحياة لمن تنادي
ربنا يتوب علينا
وفي النهايه يبقى الحال على ما هو عليه لحين إشعار أخر


من نصائح ومواعظ لقمان :

من نصائح ومواعظ لقمان:

- يا بني : إياك والدين ، فإنه ذل النهار ، وهم الليل .
- يا بني : كان الناس قديما يراؤون بما يفعلون ، فصاروا اليوم يراؤون بما لايفعلون .
- يا بني : إياك والسؤال فإنه يذهب ماء الحياء من الوجه
- يا بني : لا تؤخر التوبة فإن الموت يأتي بغتة .
- يا بني : إذا كنت في الصلاة فاحفظ قلبك ، وإن كنت على الطعام فاحفظ حلقك، وإن كنت في بيت الغير فاحفظ بصرك ، وإن كنت بين الناس فاحفظ لسانك .
- يا بني : أول الغضب جنون ، وآخره ندم .
- يا بني : الرفق رأس الحكمة .
- يابني : اتخذ طاعة الله تجارة تأتك الأرباح من غير بضاعة .
- يابني : إياك وشدة الغضب فإن شدة الغضب ممحقة لفؤاد الحكيم.