حب من أول حياتي وهمه همي

كل سنه وانت الغاليه العزيزه

كل سنه وانت الشمس الي منوره لنا حياتنا

كل سنه وانت أحلى وأجمل ورده في دنيتنا

يا ست الحبايب ياماما

كل سنه وانت الأمان والحنان

كل سنه وانت قوتي في وقت ضعفي

كل سنه وانت الوطن الي بعيش في رافعه رأسي

يا أرضي الطيبه يا بابا

كل سنه وانتم طيبين 

  ربنا يحفظكم ويخليكم ويبارك في عمركم

كل سنة دايما واحنا كلنا مع بعض 

وأنتم أبتسامة حياتنا

أدام الله عزكم  لنا في الحياة

إني مدينٌ بكل ما وصلت اليه

وما أرجو أن أصل اليه من الرفعة

إلى أمي الفاضلة و أبي العظيم

الي نعرفه أحسن من الي منعرفوش

من كام يوم وانا راجعه البيت قابلت عم محمود البواب بتاعنا

ووقفت أرغي معاه شويه

الكلام جاب بعضه ودخلنا في موضوع الريس وصحته 

ولقيت عم محمود بيقولي ربنا يرجعهولنا بالسلامة البلد وحشه من غيره 

الواحد مبيعرفش قيمة الحاجه غير لما تبعد عنه

" ده على أساس انه كان متعود يشوفوا كل يوم ولا أيه "

أنا طبعا سمعت الكلمتين دول وبرقت ووشي 

أحمر وأخضر وأصفر والدنيا لفيت بيه

معقول الي أنا بسمعه ده ليه كده يا عم محمود

ده أنت لسه من يومين كنت قايل كلام زي الفل عليه

" أيوه الفل وأنتم فاهمين طبعا زي أني فل "

وقاعد تشتكي من الحال والعيشه والبلد وان ولادك عايزين يهجوا

كل ده أتمسح في ثانيه علشان الريس راح يعمل عملية مراره

أأأأأأأأأأأأأأأأأأأأاه ياني ده أنا الي مرارتي أتفقعت

" والله ياجماعه أنا عايزاه يقوم بالسلامه كفايه أنه مسلم "

بس ده ميخلنيش أغير رأي في سياسته وحكمه

بس الظاهر أحنا شعبنا كده

ميعرفش يمشي غير لما يكون في حد دايس على رقبته

وبيمشيه بالكرباج

أحنا شعب عاطفي ياخد فوق دماغه 

ويقول حاضر ونعم

أقرب مثال الناس الي كانت معترضه على  أراء وفتاوى

فضيلة الشيخ طنطاوي  "رحمه الله"

دلوقتي بتقول الله يرحمه الراجل ده ميتعوضش 

كان مثال للوسطيه والأعتدال

ايوه الموت بينهى كل العداوات والخلافات 

ولكن مش معنى أذكروا محاسن موتاكم

أني أغير مبدئي في الشخص

يعني الشعب المصري ماشي بسياسة

الي نعرفه أحسن من الي منعرفوش

تصدقوا فعلا انا قعدت مع نفسي وفكرت في كلام الراجل البسيط "عم محمود"

وقولت صحيح يمكن يجي يوم علينا فعلا ونقول 

فين أيامك يا حسني ولا يوم من أيامك يا غالي

طبعا بعد الي هنشوفه من الي بعده

وفعلا أكتشفت ان الي نعرفه أحسن من الي منعرفوش

ربنا يرجعك لينا ياريسنا بالسلامة

نبوس ايد سيادتك ورجلك كمان 

تخليك معانا ياريس عشان

وجودك ضروره فرضها الزمان

ومن غير وجودك حقيقي نضيع

الأقصى مقدس إسلامي ................لالتهويده

..

بسم الله الرحمن الرحيم
البوست يا جماعة منقول من صاحب مدونه طهر فؤادك 

أكرمه الله وأتمنى من الله أن  يجعل مشاركتنا فى الحمله دى فى ميزان حسناتنا جميعا

وأن يجعلنا ممن ينصرون دينه

تعريف مختصر بالى بيحصل دلوقتى

"

"توقع خبراء في شؤون القدس والمقدسات الإسلامية في فلسطين أن يكون عام 2010 "عام الخطوات العملية الإسرائيلية لتهويد المسجد الأقصى".ويرى هؤلاء الخبراء أن ما شجع السلطات الإسرائيلية والجماعات اليهودية على اقتحام المسجد الأقصى اليوم هو "الرد الرسمي والشعبي العربي والإسلامي الباهت" على قرار تهويد الحرم الإبراهيمي ومسجد بلال.وكان رئيس الوزراء الإسرائيلي بنيامين نتنياهو أعلن الاسبوعيين الماضيين عن قرار يضم لقائمة التراث اليهودي الحرم الإبراهيمي في الخليل ومسجد بلال بن رباح الواقع في بيت لحم المعروف عند اليهود باسم "قبة راحيل".

ــــــــــــــــــــــــــــــــــــــــــــــــ

***** فـــــكرة الـحملة :--

---فكرة الحملة بدأ من التصريح دة ومن الشرح مختصر للموضوع الى اشعل النار داخل قلوبنا واصابنا جميعا بالغليان والحسرة وشفتوا فى الشرح المختصر دة بيقول "الرد الرسمي والشعبي العربي والإسلامي الباهت " ودة الى اصابنى فعلا بالحسرة اكثر واكثر لاننا شباب وفى ايدينا سلاح بيلف العالم كلة وهو سلاح التدوين وماشاء الله المدونات ماأكثرها وفيها الى ناطق باللغة العربية وكمان لغات اجنبية كتيرة وكلهم متابعين الاحداث دى كلها ولازم كلنا ياجماعة نتحرك ونكون ايد واحدة ونعرف العالم كلة ان

" Not to Judaize Islamic sanctities "لا لتهويد المقدسات الاسلامية"

.... عاوزين ياجماعة المدونات العربية كلها تكتب وياريت نتحرك بسرعة ياجماعة الله يكرمكوا اتأخرنا كتير وان شاء الله ربنا هيكرمنا ونعمل حاجة بأذن الله ....

ومتسمعش حد يحبطك ويقوللك "ياعم بوستك او موضوعك دة هيعمل اية يعنى " لا ارجوك متسمعش لاى حد يقلل من عزيمتك...لقولة تعالى: وَتَعَاوَنُوا عَلَى الْبِرِّ وَالتَّقْوَى [المائدة:2]. ....

وكمان لازم نكون ايجابيين ومحدش يأثر علينا بأفكار سلبية لان " الساكت عن الحق شيطان اخرس " ....

والى انت هتكتبة او هتوصلة لغيرك دى كلمة حق .. ودى امانة بدل فى ايدك سلاح التدوين استثمرة الله يكرمك وخاطب العالم سواء بلغتك العربية او لو مدونتك ناطقة بلغات تانية (انجليزية فرنسية ايطالية ... الخ ) عاوزين صوتنا يوصل العالم كلة مش بكلام بس وكمان بصور تهز العالم ونقول لا والف لا لاى تهويد لتراثنا الاسلامى ....

~إليكم بعض الافكار لنصرة الاقصى~

*استحضار النية الصادقة دائما لنصرة فلسطين ‎ الدعاء يومياً لإخوانك فى فلسطين بالنصرة *المقاطعة الصارمة لمنتجات اليهود وأعوانهم نشر أخبار الاقصى ‎ *توزيع مقالة أو مطوية تحث على التبرع والتعاطف معهم *عمل حصالة فى البيت بأسم (حصالة فلسطين) ولتتذكر قول الرسول صلى الله عليه وسلم ما نقص مال من صدقة * ارسل رسائل من الموبايل للتذكير بالموضوع *تربية الابناء على اهمية القضية وكونها قضية إسلامية من الدرجة الأولى *المشاركة فى الفعاليات التى تتم لنصرة القضية

اللهم قد بلغنا ...اللهم فأشهد 

البوست كده أنتهى

 وفي الختام بكتب خاطره مع أبليس :

نم يا إبليس واسترحْ
لا ترهق جنودك فى مساءٍ أو صُبِحْ
فقلوبنا قد ضمها حضن المرحْ
ورجالنا قد سلّموا وجه اليقين تحرقه المُزَحْ
لا داعى إذاً لالتفافك حولنا...
إجلس بعيداً واحصى جبال ذنوبنا
واضحك كثيراً من حماقةِ فعلنا
فلأنتَ ياإبليسُ أنصحُ مننا
أغويتنا وتركتنا فى مركب العصيانِ
نمضى وحدنا......
علمتنا كيف التبجح...
علمتنا.كيف السفور
وكيف نلعن ديننا
علمتنا أن الحياة بلا نفاقٍ
لن تأتينا برزقنا..
علمتنا...وعلمتنا...وعلمتنا
وبرأت من أفعالنا...
فلأنت ياإبليس أوعى مننا
عاهدت الله ولم تخلف عهدهُ
ونحن مذ كنا نمزق عهدهُ
إن ضاع منا الدين..ماذا يبقى بعده؟؟
حتى العفيف لم تدعه يحفظ نفسهُ
عاندتهُ وكسرتهُ ووضعتَ
فى وجه الثرى وجههُ
وجعلت من صحن الحرام
الجُّلُ يملأ جوفهُ...
ورويتَ بستان الطهارةِ
فُجراً يدنس طهرهُ
شيدتَ بنيان الضلالِ
وبالهوى تطاولت عمدانهُ
وعزفتَ على وترِ النفوسِ
لحونَ كفرٍ....كلٌ يعادى ربهُ
فكفاك ياإبليسُ لهواً بصدورنا
وكفاك تمزيقاً فى ثيابِ ضميرنا
أحرقت كلَ فروعنا ...أفلا تركتَ جذورنا

منقول

لســه فيك رجاله يا مصر

أمبارح خرجت أنا و واحده صحبتي كنا في المهندسين وفجأه

 وأحنا ماشيين في أمان الله  لقيت الأرض انشقت وطلع منها ثلاثة
" شياطين " قصدي أولاد

 وبدأوا في الموال السخيف الي بتتعرضلوا أي بنت

يا جميل يا قمر طيب أستنى وبدأ الكلام يزيد واللألفاظ تزيد وبدأوا يقربوا

أنا بصراحة وشي جاب ألوان وقلبي كان هيقف من الخوف

وكنا ماشين زي الصاروخ قلنا بلاش منها الخروجه دي ونروح على بيوتنا أحسن

بس طبعا تقول لمين الكلام ده وبعد ما بدأوا يقربوا بدأ مد الأيد 
" قطع أيديهم "

وواحد فيهم مسك شنطتي علشان يوقفني
" مش بغرض السرقه طبعا حاشه لله كله الا السرقه "

وكان بيقول أستنوا بس طيب نتعرف نتفاهم

 أنا طبعا لقيتوا عمل كده وفتحت حنفية العياط
" أنا كده بعيط  باللمس أو لو حد عدى قصادي "

وفجأه ظهر خمس شباب برضه مش عارفه منين ما أنا كنت تايهه من الخوف

ومسك أيد الولد وبعدها عن شنطتي بكل هدوء وقلهم

خلاص عكستهم برحتك وورت للناس انك راجل وواد برم برافو عليك يلا ياشاطر انت راجل بجد 

وبعدين خدوهم بعيد وقعدوا يتكلموا معاهم

ولقيت الثلاته الصايعين صوتهم علي وقال بيقوللهم

يعني لو هما بنات محترمين الي يخرجهم   بليل 
" بليل ده كان الساعة 7 " مدام عارفين الي هيجرلهم

بينزلوا من بيوتهم ليه

نازلين نشتري فاكهه ايه اللي نازلين نعمل ايه 

 

 البنت مبقتش تروح في مكان دلوقتي غير لما تتعكس

محترمه بقى مزودها حبتين في لبسها مبقتش فارقه

دلوقتي الولد ميحسش أنه راجل غير لما يشيل سجاره في أيده ويعاكس

" أمال يقولوا عليه عيل "

طيب لحد أمتى هنفضل كده ؟؟؟؟؟

الشباب لما تسألهم يقولوا:

البنت الي بتلبس وتتزوق وتتمكيج نازله علشان تتعاكس

بصوا على لبس البنات ؟

تسأل البنات يقولوا :

في بنات في قمة الأحترام وبيتعاكسوا برده ده حتى المنقبه بقيت تتعاكس

الولاد مش سيبين حد

طيب العيب في مين ؟؟؟؟؟؟؟؟؟؟

نفسي أعرف ؟

هو الفراغ

 ولا قلة  الدين

ولا غلاء المعيشه الي مخلي الشباب مش عارفين يتجوزوا وبيطلعوا كبتهم في المعاكسه

مش عارفه

ولكن رغم كل ده في شباب زي الورد وبيشوف أن أي بنت محترمه 
أو حتى لو واحده لابسه محزق وملزق على أنها أخته

ومينفعش يعاكسها بالعكس لآزم يحميها

زي الخمس شباب الي ربنا يكرمهم ودافعوا عننا

يعني بجد الي بيقول ان النخوه والغيره أختفت في مصر بقوله لأااااااااااااااا

لسه فيك رجاله يا مصر

ربنا يحميهم وربنا يحفظ جميع البنات