الأحد، 16 مايو 2010

لا للـــصــــــــالونـــــــــــات


ماما : يا وردتي عاملة أيه مش جعانه أغرفلك
أنا : لأ يا ميرو ياحبيبتي ربنا يخليكي
ماما : طيب مش عايزه حاجع تانيه
أنا : أيوه عايزه 
ماما : قولي يا حبيبتي و أنا أعملهولك
أنا : عايزه أعرف أيه الموضوع الي عايزه تكلميني في وبتلفي وتدوري عليه ياقمر
(ماهي ماما مش بدلعني أوي كده غير لما يكون في حاجه)
ماما : طنط منال جيبالك عريس
( أنا طبعا وشي بيتغير وأبدأ أنفخ 
وأشمر علشان المعركة النقاشية الي هدخلها مع ماما )

أنا : وأيه المطلوب مني ؟؟؟؟
ماما : ولا حاجه ده عيد ميلاد بنتها يوم الثلاثاء
وهي عزمانه والعريس هيكون موجود
أنا : ميرو أنتي عارفه أني مبحبش الحركات دي
ماما : ليه يعني هو أنا بقولك أعملي حاجه غلط
أنا هبقى معاكي وفي ناس كتير موجوده
أنتم مجرد هتشوفه بعض
أنا : قصدك نتفرج على بعض 
أنتي عايزه تخلي بنتك فرجه أنا مش فاترينه
الناس تتفرج عليه
ماما : يابنتي حراااااااااااااااااااااااام عليكي
نفسي أفرح بيكي
أنا : إن شا الله هتفرحي
ماما : أمتى وانتي كل عريس يجيلك تطفشيه
نفسي أشوف أولادك
نفسي يبقى ليه أحفاد أربيهم لك وأنا لسه بصحتي
أنا : ربنا يخليكي ليه ياميرو وتفرحي بيه وبأولادي
ماما : أنا نفسي أعرف انتي أيه 
مش زي البنات نفسك تحبي وتتحبي وتتجوزي
أنا : ساكتة خاااااااااااااااااااااااااالص
ماما : انتي الكلام معاكي ملوش لزمه
كل عريس يجي لازم نعمل الحوار ده
أنتي بتتبسطي لما تحرقيلي دمي
ربنا يهديكي
( أول ماتيجي تمشي )
أنا : ميروووووو أنا جعانه
ماما : الأكل عندك في المطبخ روحي أغرفي لنفسك

هو ده الحوار الشبه دائم بيني وبين ماما
وطبعا لازم ينتهي بزعل وخصام يومين
وبعدها يرجع الوضع لما كان عليه

طيب أنا عايزه أعرف أنا غلط في أيه أنا مقدرش أتجوز كده
معنديش القدره أني أقعد مع واحد جاي يتفرج عليه 
حاولت أني أرضيها بس مقدرتش
مقدرش أتجوز واحد يجي يتفرج ويختار البنت الجميلة والي شكلها عجبه
بغض النظر عن عقلها فكرها شخصيتها طموحها

وياعالم بيكون قاعد مع كام بنت في نفس الأسبوع
طيب ده تفكيره يبقى أزاي ......أوافق عليه أزاي
ده واحد مش فاهم أصلا يعني أيه جواز
هما قالولوا لازم تتجوز .....قال حاضر هتولي عروسه أشوفها

موضوع جواز الصالونات ده مؤلم جدا للبنات والله محدش بيحس بيه غير البنت
أنا مش هقدر أوصف مدى الوجع النفسي للبنت الي بتتعرض للموقف ده
وخصوصا لما العريس يمشي وتقعد هي وأهلها مستنين الرد
كانوا أمتحان مستنين نتيجته
وهو بيكون قلب الصفحة خلاص
أنا ليه صديقة مرت بالتجربه دي
رحلها العريس المنتظر وكان جايب معاه قبيله بحالها ورايحين بيت العروسه
كأنهم رايحين رحلة أو مول يشتروا منه حاجات
وأول ما شافوا العروسه نزلوا تقليب فيها كأنها بضاعه
وبعد كده مشيوا لا حس ولا خبر
وده كانت الصدمه الأولى
وبعد شهرين من المقابله أتصل العريس وقال لوالدها
أنه عايز يجي يشوفها مره تانيه ويحددوا معاد الخطوبه 
الظاهر أنه أتكلم بعد ما خلص لفته على البنات 
الي كانت معروضه عليه لقاها أحسن واحده
طبعا مش قادره أوصف الوجع والأهانه الي صحبتي حسيتها
وكانت أكبر بكتير من أول مره لما مردش
كانت منهاره وهي بتحكيلي
 أنا بقى جتلي هستيرية ضحك مش عارفه ليه

بس من يومها قررت أمشي على مبدأ 

لا للـــصــــــــالونـــــــــــات


هناك 32 تعليقًا:

ليله شتاء يقول...

السلام عليكم
فعلا الموضوع مهم كتيير بس كل حاجة لها أيجابيات وسلبيات ومتنسيش أنه ممكن العريس يجى ويكون طاير بيكى وأنتى تقولى لأ بيكون هو فى نفس موقف صديقتك يعنى الموضوع مش فرض ان لازم البنت هى التوافق وهو يرفض بيكون للأثنين حق الأختيار بالقبول او الرفض يمكن الطريقة للتعارف أول مرة هى اللى تختلف بتكون محل النقاش
*********
ربنا يخليلك ماما

دمتى بخير وسعادة

ليله شتاء يقول...

على فكرة ليا صديقة عايشة بالمعادى ومش عارفة ليه كل ما بدخل هنا كأننى أراها

غير معرف يقول...

يا أجمل زهره فى البستان

ماما نفسها تفرح بيكى ودا بيكون موقف أى أم بتكون عايزه تفرح وتجوز بنتها وتشوف عيالها بغض النظر أزاى هيكون شكل التعارف

على فكره انا اتجوزت جواز صالونات بس بعد ما حصل أعجاب بس جه اتفرج عليا فى البيت
هههههههههه

وبنصحك أوعى تتجوزى جواز الصلونات دا . لان الراجل بيكون عايز يستقر ومش بيدور الا على واحده تكون بنت ناس وبس وبينسى حاجات تانية كتير

ونصيبك هتقبليه ان شاء الله

لو رجع بيا الزمان مش هوافق على نوعية الجواز دا .

وأرجع وأقولك ماتروحى مع ماما وجايز تكون مكتوبالك السعاده معاه

مش عارفه
لاء متروحيش عززى نفسك وهو اللى يجيلك حد عندك فى البيت .والله عايز يشوفك يجلك حد عندك

انتى الاميره

ولا اااااقولك والله ريحى دماغك ومتتجوزيش اصلا
هههه
بهزر معاكى يازهرتى الجميله

ربنا يسعد أيامك وتقبلى فارس أحلامك وتتجوزى ان شاء الله

اتمنالك كل السعاده والحب
قولى يارب
دومتى جميله بحب أجمل

أحمد الصعيدي يقول...

بصي بقا متزعليش اني مش أول تعليق انتي استغليتي فترة أنا في الشغل ونزلتي البوست




وفقك الله في الزوج الصالح الذي يتقي الله فيكي ويشبغ ما تتمنيه


السلام عليكم

أحــوال الهـوي يقول...

شوفي يا بنتي
هااقولك الكلام اللي باقولوا لبنتي

البنت هي اللي بتختار مش الراجل
هو اللي بيعرض نفسه لانه سائل و دارس و عارف البيت اللي هو داخله و كمان البنت هي اللي بتقرر يكمل و الا لا

المفروض تشوفي الموضوع كده
مش صحيح ان الراجل هو اللي بيختار
لان القرار قرارك
و انت تزعلي و تشوفي الموضوع مهين لو انتي اللي بتروحي تتعرضي علي عرسان و يرفضوكي

يا بنوتي الزهرة الجميلة
تفتكري ازاي ممكن تتجوزي؟؟؟
تستني لما تقابلي واحد بالصدفة و تكون بينكم قصة حب و هو لا يملك انه يبدا حياته و تستني سنين و يا عالم و الا الافضل يتقدم شخص و هو طالب الحلال و مستعد لتاثيث بيت

فكري و شوفي نصف الكوبايه المليان

تحياتي

إمرأه من ثلج يقول...

اسفة بجد على تاخيرى
ظروف واللة
انتى عاملة اية وحشانى بجد

زواج الصالونات فعلا مشكلة جامدة
وانا فى راى لازم الاول اقعدمع الى بتقدملى الاول واكلم كممعاهم مرة واتنين وتلالتة مش حرام وهو كمان لكن يحكم عليا من المظهر كدجة ولس وكانة بينقى بطيخة لا بس المشكلة انك متخيلة ان لسة فى زواج بعد قصة حب والكلام دة فى الافلام

سمع هوص (Abo 3li) يقول...

مش عارف والله.... لحد فترة قريبة مكنتش مقتنع خاااالص بالجواز ده...
بس حاليا مبقتش مقتنع ولا بيه ولا بغيره...

وبتهيألي مش الراجل بس هوا ال بيعاين البنت في جواز الصالونات.. العكس كمان بيحصل.. بس يمكن الخطوة الايجابية الاولي لازم تكون من عند الراجل...
علي كل..
ربنا يوفقك لل فيه الخير... ويرزقك الزوج ال بتتمنيه...

NaiRa يقول...

زهرتى حبيبى اختى (وبعد كل الكلام الحلو )

انتى عايزه ضرب النار يا حبيبته قلبى ماما ليها حق هى عاوزه تفرح بيكى وتشوفك عروسهوهى بصراحه الست مغلطتش كلامها كله انا موافقها عليه
وانتى بردو نظريتك صح فى الاخ اللى بيجى يشترى عروسه الملود يشوفها حلوه ولا ماسخه ولا سكرها مش مظبوط
فكرتينى والله بأختى نفس اللى حصل معاها لما فكرت تقعد اعده زى دى وهى تتفرج وهو يتفرج بس اختى بردو قالت لا للصلونات
بس انتى بردو يا روح قلبى حاولى ترضى مامتك ومتزعليهاش اعدى شوفيه حتى وفى الاخر بعد ما يمشى قوليلها معجبنيش انك بس عملتلها اللى هى عوزاه وانتى بردو الىل قولتى ردك قبل ما هو ينطقو عشان تبقى انتى اللى اخدتى القرار مش الاخ اللى جاى يتفرج
ومش تحاولى تزعلى ماما خالص بقى
المهم انتو كنتو عاملين اكل ايه بقى ؟!!!!؟ ( ريئى جرى )

من كل بستان زهرة يقول...

ليلة شتاء
صحيح البنت ليها حق الأختيار في الرفض أو القبول

بس الراجل مش بيحس بجرح أو أهانه
لما بيترفض
البنت هي الي بتتأثر أكتر
هي الطريقه صعبه شويه بس في ناس بتقدر تعمل كده

أنا سعيده أني بفكرك بصديقتك ليه الشرف طبعا

من كل بستان زهرة يقول...

الحب الجميل
ربنا يخليكي ليه يا حبيبتي

على فكره هو لا هيجي ولا أنا هروح
أنا فشكلت الموضوع خلاص

وعلى فكره أنا عمري ما أروح لحد لو قررت أوافق على المبدأ هو الي يجيلي لحد عندي
هو ده الي ناقص كمان أنا الي أروحله
هههههههههههههههه

ربنا يخليكي ويسعدك طول العمر

من كل بستان زهرة يقول...

أستاذ أحمد الصعيدي

لأ أنا زعلانه أنا مليش دعوه
لازم تردهالي مره تانيه
معلش أنا الي كنت في أجازه من الشغل وأستغليتها بدري

ربنا يخليك هو كلامك المفيد ربنا يرزقني الزوج الصالح وجميع بنات وشباب المسلمين

أسعدك الله

من كل بستان زهرة يقول...

دكتور عصام

أنا عمري ما فكرت أعيش قصة حب والكلام ده قبل الجواز
أنا مقتنعه ان ده كله كلام في الهوى
قصة الحب دي لما أتجوز مع زوجي مش مع خطيبي كمان

بس انا الموضوع صعب عليه جدا
بجد مش قدره أوصفلك
أستحالى أقعد مع واحد علشان أشوفه أو يشوفني
أنا أتكسف جدا
ده موقف في غاية الأحراج

هو ربنا الي هيبعتهولي بالطريقه الي تناسبني هو أعلم بالي أقدر أستحمله

تحياتي لك

من كل بستان زهرة يقول...

فاطومه يا حبيبتي
وحشاني جدااااااااا
يارب تكون الظروف دي خير


حلوه أوي بطيخه بينقيها
فعلا أحسن تعبير عن الموقف ده

على فكره أنا لا عايزه أعيش قصه حب ولا غيره ده فعلا كلام أفلام وكمان حرام

بس برضوا مش عن طريق الصالونات

رنا ييسر لكل الناس حالها

ياريت متغبيش تاني

من كل بستان زهرة يقول...

أبو علي

بص بلا جواز بلا وجع دماغ
وبعدين مالنا كده
ماأحنا كده في نعمه نحمد ربنا عليها

وصدقني البنت مش بتعاين
أنا أعتقد اني لو أتحطيت في الموقف ده مش هقدر أرفع عيني من على الأرض
يعني مش هقدر أشوفه حتى

المهم أحنا نفرح فيك الأول وبعدين نشوف حالنا

من كل بستان زهرة يقول...

نيرو
كده أنا قولت انتي أختي حبيبتي وهتقفي جانبي
طلعتي أول واحده ضدي وكمان عايزه تضربيني بالنار

وبعدين أنا مش قصدي أزعل مامي حبيبتي
دي أحلى حاجه في حياتي
بس هي كمان متجبرنيش على حاجه

وكمان أنا خايفه على العريس ده
يعني هيتجوزني وبعدها بيومين هيندم
لابعرف أطبخ ولا أعمل أي حاجه في البيت
مدلعه أوي
هبقى عايزه أروح كل يوم لأهلي لو رفض هنكد عليه
طيب مش أنا كده طيبه وعايزه مصلحته

عموما سيبك بس من موضوع العريس ده و تعالي بس أنتي وهتلاقي كل الأكل الي نفسك فيه

Tarkieb يقول...

مفيش حاجة لها قاعدة ..مين عارف يمكن جواز الصالون اتعمل لهدف معين وهي الفرصة الوحيدة اللي ممكن تقابلى حد عمرك ما حتقابليه الا بالطريقة دي... رأي انت مش ح تخسري حاجة وكل اهلنا اتجوزوا كدة وعارفة والله من كتر العشرة بقو بيفهمو بعض من غير كلام وحتى شكلهم بقى شكل بعض.. النصيب ح يصيب حتى لو على حصيرة مش صالون...في اوروبا اعلانات الجواز في كل الجرايد ...رغم كل الفرص اللي عندهم للتعرف .. ولا تحبي اكلملك شبطة ؟ اهو بعد ما يجوز البولة واللول اكيد عايز زباين ...

فارس عبدالفتاح يقول...

بصي يا بنت الحلال

مش هقلك نصيحة من اخ لأخته لأنه لا أنا أعرفك ولا أنت تعرفيني لكن بكل صدق وأمانة أنا هاقص عليك هذه القصة لأوضح لك الحقيقة التي توصلت إليها وقد أكون مخطأ وهذا يتوقف على تقييمك .. لكن هذه الحقيقة المجردة بالنسبة لي .. فإقرائي الكلام اللي هقوله كويس وفكري فيه بعقل وبموضوعية خارج عن العاطفة النسائية تماماً يعني بتجريد


أولا : أنا شاب ابحث عن المستقبل من خلال السفر مثل الكثير من الشباب وابلغ من العمر 32 عاماً أردت أن أتزوج مثل أي رجل ومثل أي فتاة وبسبب السفر فانا لا اعرف أين هي فتيات العائلات المحترمة المحافظة شكلاً وموضوعاً فأطريت إلى أن ابحث بنفس الأسلوب الذي ترين انه شيء بشع وشيء غير محترم بالنسبة للفتيات واهنة لهن ..


فحصل لقاء بيني وبين فتاة بنفس الطريقة ولكنها لم توافق بسبب سفري لأنها تريد مني أن اجلس بجوارها ونعيش أنا وهي في حياة سرمدية من الخيل الممتلئة بالأزهار والورود والفراشات والشيكولاتة والعطور والألوان الزاهية البراقة ... إلى الخ


ولا أسافر وهذا أمر محال وليس مستحيل فقط لان رزقي ومستقبلي يعتمد على السفر ..


الثانية : كانت على نفس هذا المنوال ولكن بنسبة معينة من الواقعية لا ترقى إلى مستوى يستحق الاهتمام مني كرجل أو كشاب بان اهتم بمثل هذه الاتراهات


الثالثة .. والرابعة : وانتهت الأجازة وأنا لم استطع حتى أن اخطب أو حتى أتعرف على واحدة يكون بيني بينها اتصلا لأني كرجل تربيت في بيئة محافظة اعتبر أن هذا شيء غير محترم وينقص من قيمة الفتاة في نظري وفي أخلاقها وفي عفتها الأخلاقية المعنوية

المهم


انتهت إجازتي ورجعت إلى السفر ولكن هناك مشكلة حقيقية تواجهني وهي كيف احصل على إنسانة تتفهم موقفي وتريد أن تكون زوجة محترمة لإنسان يريد أن يكون زوج محترم ويكون أسرة محترمة تتحمل بعدي عنها لفترات طويلة .. حيث أن واقع الفتيات غير ذلك تماماً فهن يريدن حياة خيالية لا تمت إلى حقيقة الحياة بشيء

المهم رجعت وأنا في مشكلة حقيقية في فهم الفتيات والنساء بصفة عامة


أتسأل .. ما هذا الكائن العجيب المغفل ( عفواً ) الذي لا يعلم عن صراع الحياة والسعي وراء الرزق والتخبط في طرقات الحياة ليصل إلى مستوى مادي يؤمن له حياة كريمة في عصرنا هذا الذي أصبح فيه المرء أن أراد أن يحصل على شيء فانه يخوض غمار حرب طاحنة ضروس .. وأنت مضطر بلا ادني اختيار إلا أن تدخل هذه الحرب حتى تصل على ما تريد ... والفتيات ليس عندهن ادني خبر وهي تبحث عن الحب والعشق والهيام والخيال والوهم دون النظر إلى حقيقة ما يعانيه الرجل انه يصارع من اجل البقاء وان يكون إنسان محترم في المقام الاول وان يكون رجل بمعنى الكلمة وان يؤمن لمن يعول حياة كريمة

فجلست أفكر كيف أصل إلى جوهر الإشكالية باستفاضة وعمق عن ( الفتاة - النساء - المرأة ) فجلس اقرأ واقرأ واقرأ واقرأ واقرأ في جميع الكتب الاجتماعية والنفسية والتاريخية والفلسفية والعلمية عن .. ما هي المرأة وما هي نفس هذا المخلوق الغريب العجيب

فارس عبدالفتاح يقول...

قرأت أكثر من 13 كتاب .. اتضح لي بعدها أن المرأة أو النساء أو الفتيات ينظرنا للرجل ( الجنس الآخر ) بنظر تختلف عن نظرة الرجل للمرأة ( الجنس الآخر ) تماما مع العلم أن – النتيجة – لمنطق الرجل في وجهة نظرة ومنطق المرأة في وجهة نظرها واحد .. لكن الرؤية في وجهة النظر تختلف


المهم المرأة تريد من الرجل أن يحبها ويعشقها ويموت غرام بها قبل أن يريد الارتباط بها وقبل أن تعطيه أي شيء من جسدها .. بمعنى أن هناك عقده الدونية ( عفواً ) لدى المرأة أن الرجل لا ينظر إلى المرأة إلا من اجل الجنس .. وهذا خطأ تماماً حتى ولو كان الجنس داخل في هذه العملية بحكم طبيعة الرجل

فهي تريد أن تتيقن أولا وقبل كل شيء أنه يموت بها غراماً وحباً وشغفاً إلى آخره من هذه المفردات ... حتى يحقق للمرأة شخصها أو إنسانيتها قبل أن تكون مجرد طرف آخر في عملية جنسية مع العلم أن الجنس متبادل وهذه حقيقة لا نقاش فيها ( عفواً )

ولكن المرأة تريد تحقيق شخصيتها وذاتها وانتزاع اعتراف من الرجل بالحب والغرام قبل أي شيء .. وهذا من واقع نظرتها الدونية ( لنفسها ) أولاً فتريد استرجعا واستعاض هذه الدونية باعتراف الآخر بها عن طريق الحب والغرام.. اولا مث يكن بعدها ما يكون

المهم

نظرة الرجل غير ذلك تمام الرجل يريد زوجة محترمة تحفظه ، عاقلة رصينة ذات خلق تتحمل معه عبء الحياة جميلة ذات نفس طيبة يشعر معها بالأمان والطمأنينة والحب والغرام أيضا ... لكن هذا آخر شي يفكر فيه بسبب نظرته الرجولية الموضوعية وصراعه في الحياة فهو يبحث عن المرأة المسؤولة قبل المرأة الحبيبة .. والفتاة بالعكس تبحث عن الرجل أو الشاب التي تستطيع ان تنتزع منه اعتراف بالحب والغرام قبل أن تبحث عن الشاب المسؤول


فهي تريد الحب أولا قبل أي شيء قبل العقل قبل أن يكون إنسان محترم قبل أن يكون إنسان يستحق أن يكون زوج لأصفاته الاخلاقيه .. وهذه هي الإشكالية الحقيقية في علاقة الرجل بالمرأة بعد قراءة طويلة ومستفيضة وعميقة جداً


المهم : بصي يا بنت الحلال


ليس ما تطلبه منك أمك عيباً أو حراماً أو شيء يهين كرامتك أو يذل نفسك .. الرجل لا ينظر إلى هذه الأمور أبداً .. الرجل ينظر هل أنت فتاة تستطيعين أن تكون زوجة مخلصة تتحمل المسؤولية في تربية أبناءه وتحمل عبء صراع الحياة ولديها نفس طيبة وعقل رصين وتكونين على قدر معقول من الجمال الشكلي والأخلاقي .. حينها إذا توفرت تلك الشروط لديك فان أي رجل محترم عاقل يحترم نفسه أولا قبل أي شيء وبعد أي شيء ..

فانه سوف يعطيك الحب والغرام والهيام وكل ما تشائين وأكثر مما تتوقعين حينما يجد الرجل أن اختياره كان اختيار صحيح وانك الإنسانة التي كان يرجوها ويتمناها ويأملها معه في طريق حياة


مع أطيب التمنيات ،،


فارس عبد الفتاح .. قومي عربي

richardCatheart يقول...

هههههههههههههههههههههههه
والله الله يكون فى عون الامهات هههههههه والبنات طبعا علشان ماتزعليش

بصى ياجميل اللى هاقولك دا حق وعن تجربه منى ومن اللى حوليا

الحب جميل بس فى انهى صوره صوره البنى ادام اللى تتعرفى عليه وتعرفيه بره البيت سنه واتنين لغايه متدرسو بعض وبعدين يتجوزك بعد ماتبقو شبعتو حب
وبردو ياهيطلع كويس يا هايطلع وحش

ولا صوره الحبيب المناسب فى الوقت الماسب والظروف المناسبه

لو الاولى بقولك لاء لانكم هاتكونو شبعتو حب وعموما لو مشعبتوش بعد الجواز بوقت العشق والغرام بيتحولو
لحب بردو بس فى صوره اهدى واعقل
وديما اى مشكله هاتقبلكم هاتقولى ازاى دا اتغير مابقاش هو بتاع زمان
لانك اتعودتى على شكل معين مش عايزة يروح

لو التانيه بقى لازم تدى نفسك فرصه تمرى باى تجربه محترمه توصلك للانسان المنساب من وجه نظرك
ثم ايه موضوع يتفرج عليا ايه الفكره الغريبه دى لاء طبعا هو جاى علشان يشوف انسانه محترمه معارفه ضمنين بيت محترم لانه انسان محترم ويا يحصل قبول يا لاء
ولو حسبتيها بموضوع الفرجه دا طيب ما انت كمان هاتتفرجى وهاتردى يا حصله قبول عندك يالاء
ثم ان علشان العريس اللى اتقدم لصحبتك
قليل الذوق يبقى الكل كده والله لو طلع كده تقدرو تهزقو ويعرف حدوده وخلصت
وفى الاول والاخر جواز الصالون ماهو الا وسيله للتعارف ووجود القبول من عدمه
زيه زى زميلك فى الجامعه او الشغل او ابن الجيران كلها وسايل وبعديت تيجى
فتره الخطوبه اللى تبين ولازم تدققى فيها اوى
وحطى فى دماغك انك مش بتتخطبى علشان تتجوزى انت بتتخطبى علشان تعرفى الشخص فى ايطار محترم تقدرو تخرجو وتشترو وتتكلمو والانسان بيبان عيبه الجوهريه فى المعامله
يابنتى كل اللى اتجوز عن قصصه خرافيه
ياخد على دماغه ياطلق اسمعيها حكمه
من اختك الكبيره ترتر هههههههههه
ادى ديما فرصه للنصيب ماتكونيش قطاعه ارزاق ليه وليكى وزى ماورد ماتعجبهوش وارد جدا انه هو اللى مايعجبكيش
وفى الاخر النصيب غلاب
ربنا يصلحلك الحال ويجعلك الزوج الصالح
يا فلورا

فارس عبدالفتاح يقول...

اولاً : انا فعلاً اسف على الانفعال لكن كان هذا من واقع ما عنيته فخرج في كلامي وان اشرح موقفي مما جرى

ثانية : انا لا انظر الى المراة بدونة كما تقولين وانما كان هذا راي اكبر علماء النفس لا يحضرني اسمه الاني

حيث قال ان المرأة هي من تنظر الى نفسها هذه النظرة وتريد من الرجل ان يثبت لها شخصيتها وذاتها كما اوضحت ولا تريد ان تكون مجرد موضوع جنسي للرجل

ثالثا : احترم وجهة نظرك ولكن ما هي طوحات النساء في الحياة غير ان تحظى على رجل محترم واسرة طيبة وذرية صالح .

هل تريد ان تكون قائد عسكري مثلا او احد الفاتحين او احد الزعماء السياسيين


لا اظن ذلك بل هي تريد الطمأنينة بجوار رجل محترم

لا اكثر

واذا كنت مخطأ يا ليت تشرحيلي ما هو خطئي

MONTY يقول...

انتى صح صحححححححححح


وف الاخر الجواز قسمه ونصيب ولما ييجى وقتها محدش هيقدر يقف ف وش القدر...

انا اتغظت اوى م العريس دا بتاع صحبتك وكل العرسان اللى زيوا يغيظوا اوى


ربنا يسعدك وتلاقى العريس الصح وتحبيه من غير صالونات ومن غير اى اهانه لمشاعرك

اول زياره وياريت تقبلى مرورى

دومتى بالف خير

-_- يقول...

اسلوبك جميييييييل جدا في الكتابة بجد برافو عليكي


انا بكره جواز الصالونات جدا .. بحس ان العروسة تحفة جاي العريس يشتريها يا تعجبه يا متعجبوش و يمشي يدور على تحفة في محل تاني

RASHA يقول...

انصحك بزواج الصالونات
لان النسبة الاعلى فى الطلاق ثبت انها للمتجوزين على حب بعد الشر عليكى طبعا بس الحقيقة انا مش شايفة اى مانع من التعارف من خلال الاهل

فارس عبدالفتاح يقول...

شكراً ... وربنا يوفقك

وعلى فكره انا لست من صنع امراة ولا صنع رجل وعلى هكذا قد تربينا نكن لأهلنا العرفان ونخفض لهم جناح الذل من الرحمه ولكن لسنا صناع لاحد ولا لاحد فضل على احد .. هكذا تكون انفة الرجال


اسف على الازعاج واتمنى لك التوفيق

من كل بستان زهرة يقول...

تركيب
ههههههههههههه
لأ شبطه لأ الله يخليك
خلاص انا موافقه على الحصيره أهو أي حد ألا شبطه

من كل بستان زهرة يقول...

richardCatheart

والله كلامك كله صح يا ترتر
هههههههههههههه
بس أنا بجد مش من نوعية البنات الي عايزين يعيشوا قصة حب
أنا موافقه جدا على
الحبيب المناسب فى الوقت المناسب والظروف المناسبه
ربنا هو الي هيبعتهولي من عنده
وبعدين أختك زي القمر يعني أي حد يتمناها ههههههههههههههه
أنا بهزر
ربنا يخليكي ليه يا جميل

من كل بستان زهرة يقول...

MONTY

والله انتي الوحيده الي فاهماني
ربنا يخليكي يارب
أنا والله كمان نفسي أشوف العريس الي اتقدم لصحبتي
انا ممكن أموته من كتر غيظي منه
والله البنت صعبانه عليه جدا
بس مش عارفه ليه كل ما أفتكر حكايتها أضحك
يا ربنا يوفق كل البنات

وأنا بجد بشكرك جدا على انك نورتيني
أتمنى اني أشوفك دايما يا جميل

من كل بستان زهرة يقول...

شارم

يعيش يعيش شارم باشا
والله انت مفيش زيك
انت الي فاهم أنا بفكر في أيه
الدنيا لسه فيها خير
يا ولاد
تحياتي ليك

من كل بستان زهرة يقول...

رشا الجميله

والله مش بتتقاس بالنسب
كل واحد وقدره
ممكن كلامك يكون صحيح بس المشكله فيه انا

عموما انا خلاص اتخلصت من عريس الهنا المره دي ربنا يستر المره الي جايه
و كل شئ قسمه ونصيب

أسعدك الله

من كل بستان زهرة يقول...

فارس عبد الفتاح

أتمنى انك تكون فهمت وجهة نظري
وأتمنى زيارتك لي مره أخرى

تحياتي لك
أسعدك الله

موناليزا يقول...

هى وجهة نظر تحترم
بس غالية الزيجات الناجحة بتكون صالونات لان العقول هى اللى بتتحكم فى الموضوع وزى ما العريس واهله بيروحوا يتفرجوا على العروسة ..العروسة كمان بتستنى تتفرج عليه هو وأهله
يعنى ماتاخديش الموضوع بحساسية كده:)

من كل بستان زهرة يقول...

موناليزا

والله مش شرط ان الي متزوجين صالونات بيحكموا عقلهم
دي بترجع لفكر كل شخص ومدى تحمله للمسئولية
ومدى نضوج الطرفين
النضوج الي بيخليهم يدركوا انهم مقبلين على حياة جديده ومسؤولية كبيره

أو يمكن فعلا انت وجهة نظرك صحيحه وانا الي عندي حساسية زياده من الموضوع ده

عموما ربنا يرزقني واياكم كل الخير

تحياتي ليك
وسعيدة بتشريفك ليه