السبت، 18 ديسمبر، 2010

أنور باشا



هو : صباح الورد يا أجمل ورد
أنا : صباح الورد يا أنور باشا
هو : قوليلي يابت ياورد أنتي حلوه كده أزاي
انتي بتفطري عسل الصبح
أنا : بت ؟؟؟؟؟؟؟؟؟؟؟؟؟؟
بت بت.... طالعه منك زي العسل
وبعدين ياراجل انت مش هتبطل معاكسه
هو: حد يشوف القمر ويقدر يمسك نفسه
بقولك أيه تتجوزيني؟
أنا : هههههههههههههه
هو : بموت انا في القمر وهو مكسوف
طيب خدي الورده بتاعتك يا حبيبي

ده الحوار اليومي ما بيني وبين عم أنور
او بالأصح أنور باشا

كل يوم الصبح وأنا داخله الشركة
بشوفه قاعد في جنينة الفيلا بتاعته الي قدام شركتنا
ولازم ينادي عليه ويديني وردتي
أنور باشا ده راجل كبير 
من بشوات زمان 
راجل شيك جدا

بحس بالتفاؤل لما أشوفه كل يوم الصبح
ومجرد وجوده بيحسسني بالأمان

من كام يوم مبقاش يقعد مكانه
سألت الجنيني الي عنده
قالي أنه تعبان شويه
روحت أزوره قالي متخفيش عليه
أنا لسه بدري عليه أوي
لسه مطول معاكي
بس أنا كنت خايفه جدا
وعندي أحساس أني مش هشوفه تاني
النهارده للأسف عرفت أنه توفى 
بعد ما سيبته بكام ساعه
حسيت أن قلبي وجعني أوي
أحساس صعب جدا لما تفقد صديق وأب 
كنت دايما أروح أقعد معاه
و نتكلم مع بعض
كان بيحكيلي عن حياته زمان
أسلوبه ممتع جدا
وكان عنده حل لكل مشكله تواجهني
كان هو اقرب صديق ليه
يعرف عني كل اسراري

حاسه أن الدنيا كلها بقى لونها أسود
للأسف كل حاجه حلوه في الدنيا دي
لازم تروح مننا
كل الطيبين بيموته
ربنا يرحمه
ويصبرني على فراقه

هناك 32 تعليقًا:

محمد الجرايحى يقول...

رحمه الله تعالى وأسكنه فسيح جناته
وجعلها الله آخر الآحزان....

سندباد يقول...

ربنا يرحمه ويسكنه فسيح جناته
لله ما اخذ ولله ما اعطي

Ramy يقول...

ربنا يرحمه

و هتلاقى صدقينى فى الدُنيا ناس كتير

روحهم جميلة

ربنا معاكى

Casper يقول...

ربنا يرحمه ويدخله فسيح جناته
بالتأكيد الفراق شئ صعب جدا
لكن ما باليد حيلة هذا قدر الله
قدر الله وما شاء فعل

Tarkieb يقول...

الله يرحمه ....كان برضه رافع من روحك المعنوية صباحيا يلا بقي يا ستي اتفطمتي بدري ...بس انت كنتي متأكده انه نظره كان سليم لاخر أيامه؟ حتي لو مات ذكراه مش بتموت يا ستي .واكيد عمل ثواب جامد كل يوم بشوية الكلمتسن الحلويين دول..البقية في حياتك ...على فكرة لو كنت قريتي القصة بتاعتي للاخر كنت ح تعرفي انه ممكن يقابل الحاجة نيفيين ..

من كل بستان زهرة يقول...

محمد الجرايحى
شكرا جدا لشعورك الطيب

من كل بستان زهرة يقول...

سندباد

يارب يدخله فسيح جناته
ويرحم جميع الأموات

من كل بستان زهرة يقول...

رامي

اكيد في ناس كتير في الدنيا كلها خير وطيبه
بس هما الي بيموته
والفاسدين قاعدين

ربنا يرحمه

من كل بستان زهرة يقول...

كاسبر

اكيد لله حكمه في الموت
الموت صعب ولكن قدر يجب ان نؤمن به

من كل بستان زهرة يقول...

تركيب

ده تريقه بقى ده ولا ايه
لأ متقلقلش كان احسن حاجه في نظره
كان 6/6
راجل عنده ذوق و بيفهم في الجمال

على فكره انا حظرته من الحاجه نيفين
خاليها للي بيتريق على الزمالك

موناليزا يقول...

ربنا يرحمه
فعلا مابيفضلش من الانسان غير ذكراه

مدونة اكسجين مصر يقول...

من أجمل ما
قيل في الورد فهو الحياة ..
فهو .. يحمل العديد من اللغات الخاصة به ..
التي نعلمها .. والتي لانعلمها

Tamer Nabil يقول...

ربنا يرحمة


فراق الاحبة ديما صعب


مع خالص تحياتى

karmen يقول...

ربنا يرحمه ويصبرك حبيبتي الحمدلله علي كل حال

amiralcafe يقول...

صباح الورد..اه منو هذا الذي يسموه الحب وانوعه رغم كل التغير التي يحدث من حولنا فهو مازال يسمى حب .
انو باشا عنده ذوق و بيفهم في الجمال ربنا يرحمه.
رؤوف

فارس عبدالفتاح يقول...

باشا من بتوع زمان .. اقطاعي يعني واللى من الراسمالية المستغلة .


ربنا يحسن ختامنا جميعاً ويرحمه ويرحم موتانا وموتى المسلمين .

من كل بستان زهرة يقول...

موناليزا
ربنا يخليكي
ويارب يرحم جميع امواتنا

من كل بستان زهرة يقول...

اكسجين مصر

الورد جميل
بس عم انور كان اجمل ربنا يرحمه

من كل بستان زهرة يقول...

تامر نبيل
ربنا يصبرنا جميعا على فراق من نحب
ربنا يخليك

من كل بستان زهرة يقول...

كارمن
ربنا يخليكي ليه يا اجمل كارمن
ميرسي جدا على كلامك

من كل بستان زهرة يقول...

رؤؤف
انور باشا الله يرحمه
فعلا كان باشا ومحترم وطيب وبيحب كل الناس
وعنده ذوق عالي جدا

يارب يغفرله

من كل بستان زهرة يقول...

أستاذ فارس

اقطاعي ايه ورأسمالي ايه
هو لازم بشوات زمان يكونوا ناس اقطاعيين

باشا يعني من عائلة عريقه لها اصول
انسان طيب ومحترم وكان بيحب الفقير قبل الغني
تعالي شوف الناس ملمومه ازاي على فيلته
الفقراء قبل اي حد
كلنا حاسيين اننا فقدنا اب
ربنا يرحمه ويغفرله ويدخله فسيح جناته

momken يقول...

رحمه الله

دائماً تذهب الاشياء الجميله فى الحياه

عجبنى الحوار جدا
تسلم ايدك

تحياتى

جايدا العزيزي يقول...

رحمه الله تعالى وأسكنه فسيح جناته
وجعلها الله آخر الآحزان....

تحياتى

فارس عبدالفتاح يقول...

الفاضلة / زهرة الورود

انا لا اقصد الاستهذاء او التهوين من وقع الصدمة عليك ولكن .

انا ايضا من عائلة ضاربة في عمق التاريخ ولها نسب عربي اصيل وعريق ومع ذلك معنديش فيله او قصر .. ولا واحد من عائلتنا كان باشا او بيه .. كلهم كانوا فقراء ولكنهم كانوا اصحاب اصل حسيب نسيب ووجاهة .

فما منطلق العراقة والاصالة من وجهة نظرك .

على فكرة احب اوضح شيء بسيط وارجو ان يتسع صدرك ويفتح لك افق التفكير في هذا الامر .


رسول الله صلى الله عليه وسلم كان ذا حسب وذا نسب في بني هاشم وفي قريش على الاطلاق .. ومع ذلك كان من افقر بيت في بني هاشم وفي قريش ايضا .


كذلك عمه ابو طالب زعيم قريش ابو علي كرم الله وجهه .. كان فقيراً . مع الاسف الشديد .

فالفقر والغنا ليس معيار للاصل والحسب والنسب العريق .. وما جعلني امتعض من كلامك هو النظرة الطبقية الموجودة في كلامك .. فانا اكره الطبقية بجميع اشكالها .


واكر للمرة الثانية لا اقصد أي تجاوز او استهتار .. وما دعاني ان اكتب هذه الكلمات هو تقديري لك ولشخصك .

من كل بستان زهرة يقول...

momken
ربنا يرحمه
مش عارفه ليه دايما الأشياء الجميله بتختفي من حياتنا
سواء اشخاص اوقات اماكن
عموما هي دي حال الدنيا

نورتني

من كل بستان زهرة يقول...

جايدا الجميله

ربنا يرحمه
بشكرك على ذوقك

نورتيني

من كل بستان زهرة يقول...

استاذ فارس
انا عارفه انك لا تقصد الأستهزاء بكلامي
وبالشخص رحمه الله
وانا لم اقصد في كلامي اي نظره طبقيه
وبعتذر لو ده الي فهمته يمكن عبرت عن الشخص بأسلوب خاطئ

والأصل والعرق ليس لها دخل او صله بالغنى او الفقر
ولكن ليس معنى ان رسولنا الكريم كان ذو اصل وحسب ونسب وفقير
ان يكون اصحاب الأموال والأغنياء ليسوا اصحاب نسب واصل

اعتقد ان مش ذنب اي شخص انه ولد غنى ومن اصل عريق ولا يدل على انه حرامي او استغلالي او طبقي
خطأه الوحيد ان يكون عديم الأخلاق او متكبر ومتعالي على من دونه من البشر

هذاالشخص لم ارى منه غير اخلاقه الجميله وصفاته البديعه وتدينه الشديد وكرمه الذي فاق الحد
رحمه الله وغفر له خطاياه

يارب يكون قصدي وصلك
بشكرلك ذوقك
ودايما بيشرفني وجودك

(هيبو) يقول...

دائما وابدا
لا يموتوا الاشرار ولا السيئون وانما فقط الطيبون
هذه هي الحياه

كل نفس دائقة الموت
سلام

فارس عبدالفتاح يقول...

وصلني المعنى وانا اتفق معاه واشكرك على اهتمامك .

من كل بستان زهرة يقول...

هيبو
اخبارك ايه؟؟
واخبار المغرب واهلها؟


هو كل الناس هتموت اشرار طيبين
بس فعلا الأشرار معمرين اكتر
يمكن ربنا بيمد في عمرهم علشان لو في اي خير عملوه يخدوا حقهم في الدنيا

عموما ربنا يرحمنا جميعا ويبعد عننا الأشرار
نورتني

من كل بستان زهرة يقول...

استاذ فارس

انا سعيده جدا انك وصلك معنى كلامي
وعن اقتناع

بشكر لك زيارتك