الخميس، 26 يناير 2012

قلب الوطن إنجرح





أنا مش عارفه الكلام الي هكتبه ده ليه لازمه
ولا هيبقى غلط إني كتبته

أنا حقيقه مرعوبة ومحبطه وندمانه

يوم 24 يناير حضرت نفسي وكان عندي حماس يهد جبال
أتصلت بيه والدتي (هي مسافره )
وقالتلي بلاش نزول الله يخليكي أنا مش معاكي وهبقى قلقانه

بعد محايله أستمرت ساعه قالتلي إنزلي بس خلي بالك من نفسك أوي
وكانت دي أول غلطه أرتكبها عدم سماعي لكلام ماما
وفعلا خليت بالي من نفسي أوي .. أنا أسفه يا ماما

صحيت الفجر وحضرت نفسي
ونزلت الساعه 8 الصبح كان عندي مشوار في المهندسين

خلصته ورحت على ميدان مصطفى محمود وقابلت صديقاتي
ووقفت هناك وهتفت بأعلى صوت
وحسيت وقتها أن الثورة راجعه تاني وبدأت أرسم أحلام

صحيت منها على صوت إتنين بيتخانقوا مع سواق تاكسي
كان بيدافع عن العسكر



بعدت عن الخناقه وكملت هتاف
لقيتهم بيقولوا أن المسيره هتتحرك الساعة 2 ظهراً

ولشدة حماسي مقدرتش أصبر
روحت راكبه أول تاكسي وأتجهنا ناحية المترو

وروحنا التحرير ودي كانت تاني غلطة أرتكبها


أول ما تنزل المحطة وتتجه ناحية باب الخروج
تحس إنك يوم الحشر

زحمة جداً ومفيش هوا ومفيش حد مستحمل حد
الناس كلها بتتخانق مع بعض

عملت نافسي مش سامعه حاجه وأطلقت أقدامي ناحية الباب
وخرجت منه بقوة الدفع




طلعت لقيتني جنب منصة الإخوان لقيتهم مشغلين أغاني
( سوف نبقى هنا كي يزول الألم )


وبدأت أتوغل في الميدان
كنت فاكرة إن كثرة أعداد المتظاهرين هتحسسني بالسعاده

لقيت العكس إني أصبت بالخنقه
كل ما نلاقي ناس بتهتف نقف علشان نهتف معاهم
الاقي معظم الهتافات فيها كلام خادش للحياء
نمشي نروح مكان تاني
الاقي ناس بتشوي ذره وناس تانيه ملمومه على عربية الفشار

وواحد تاني عمانا من ريحة دخان البطاطا المشوية


ناس كتير بتتخانق ومختلفه في رأيها
ناس بتدافع عن الإخوان وناس بتشتم فيهم
ناس ماشية تقول شرع الله هو الحل وناس بتتريق عليهم

واحده ماسكه يافطه مكتوب عليها
أنا نازله علشان أحتفل إني خلعت مبارك وأكمل ثورتي على العسكر

مسلمتش من التوبيخ


أمهات شهداء بيبكوا بحرقه
وناس تانية قاعدة تشغل أغاني وتغني وراها


وفاجأة بدأت الكارثة ببص حوالية ملقتش حد من الي كانوا معاية
الظاهر إني سرحت وبعدت عنهم

المهم كلمتهم وإتفقنا إننا نتقابل عند عمر مكرم


وكانت  أسود نص ساعة مرت عليه في الميدان

وأنا ماشية وسط الزحمة بدأت أحس بأيادي خفيه بتمتد نحوي

وللاسف أنا إنسانه خوافه بطبعي لساني اتخرس
وبدأت ابعد اديهم عني في صمت


ولكن لا حياء لمن تنادي



الدنيا بدأت تلف بيه ورجلي مبقتش شيلاني
لاقيني وقعت على الأرض وأنا منهاره من العياط


راجل ابن حلال انتشلني قبل ما اموت دهساً بالاقدام
وسندني لأقرب رصيف
وقعدني عليه
وقالي حد يجي الميدان لوحده
أهلك فين إزاي سيبينك تنزلي لوحدك



حالة الصمت فضلت مسيطره عليه وهو بيحاول يكلمني
كل الي قدرت أقوله عايزه أروح عمر مكرم

تكفل الراجل الغلبان بتوصيلي لعمر مكرم وحمايتي
لحد ما لقيت الي كانوا معاية


بعدين تكفل مره أخرى بإخراجنا على حدود الميدان

وأنطلقنا بسرعة الصاروخ كلا الي بيته

وصلت البيت وبما اني لوحدي فيه...
قفلت باب الشقه عليه .. وقفلت كل الشبابيك وأبواب الغرف
وبكل ما أوتيت من قوة روحت مصرخه ومعيطه

ومش لاقيه حاجه أقولها غير حد يجبلي أمي وأبويه ..
ولكن ......


إحنا الشعب الخط الأحمر
بقولها للشعب نفسه
إنضفوا بقى يرحمكم الله
كنت متوقعه الي هيحصل ده بس مش بالطريقه دي
بس الحمد لله على كل شئ
الثورة لسه مستمرة



هناك 8 تعليقات:

فاتيما يقول...

مش عارفة اقولك ايه يا زهرة

بس يا حبيبتى هذا ما يسمى
بــ اخلاقيات الزحام
وما تحمله لنا من بشاعات

مش عاوزة أقولك ان هكذا يكون أى مكان مزدحم فى مصر ...
والتحرير على نقائه
فيه ناس مرضى برضو

خيخة واجهت موقف مشابه
وناس اشتكت

بس التغيير ف الاخلاق
عاوز تغيير جذرى ف نواحى كتير


انا اسفة عشانك وليكى
بس اتمنى
ان شاء الله
المرة الجاية اللى تنزلى فيها الميدان
تكون عكس كدا خالص

وآه هتنزلى
متقوليش مش هيحصل ..

بس خدى وقتك كفاية

تانى
انا بعتذرلك بالنيابة
عن أى سخافات حصلت
ومعلش

معلش

فاتيما يقول...

انا لسه هقوم ااستعد والبس وانزل التحرير عشان امشى ف أى مسيرة وبعدين نرجع ع التحرير ...

قولت أصبح
واطمن


يا رب تكونى بخير

والنهاردة هعاتبلك الميدان
واقوله ميزعلكيش تانى
:)

روقى بقى
ولاّ اقولك أغضبىاكتر
النهاردة جمعة غضب
:))

صباح الخير يا زهرتى الحلوة

من كل بستان زهرة يقول...

فاتيما يا حبيبت قلبي

أنا عارفه إن الي حصلي ده أمر طبيعي
بس صعب عليه نفسي أوي
وحسيت إني ضعيفه جدا علشان معرفتش
أخد حقي من الي عمل فيه كده

وقاعده لوحدي في البيت فالخوف زياده شويه
حضن الأم بيفرق قوي يا تيما


عارفه اني فعلا قولت مش هنزل تاني
هو ايه الي يخليني أبهدل نفسي

لقيت قلبي وجعني وقعدت ألوم نفسي إني قدرت أقول كده

أهدى بس شويه وهنزل علشان خاطر مصر تاني

مصر الي تعبتنا قوي يا تيما

خلي بالك من نفسك أوي الله يخليكي

يارب يخليكي ليه وميحرمنيش من قلبك الطيب ده
أنا بحبك أوي أوي أوي يا تيما

فاتيما يقول...

انا كمان يا حبيبتى
والضربة اللى متموتش تقوى
وانتى خرجتى م الموقف دا أجمد والله
وبكرة تقولى فاتيما قالتلى

المرة الجاية
مطوة و ف وشه
او ارقعى بالصوت
وألف مين يجامل يا ماما
دا الميدان مليان ناس على اخرها م المجلس كانوا هيشرحوه ...

والله انا بيصعب عليا الناس دى
اصلى لو صوتت
ولميت عليه الرجالة بس
اللى حواليا ..هيبهدلوه
وهوه مريض اصلا
فمش هيبقى مريض وبعاهة كمان
:)

احنا اهلك يا زوزو
وكويس انك حكيتى
عشان اجى اعمل ماما هنا
واحضنك حضن افتراضى
ولا حضنى دا مينفعشى سعادتك ؟!!!!

:))

بحبك خالص

فارس عبدالفتاح يقول...

والله مش عارف اضحك واللى ايعيط

من كل بستان زهرة يقول...

يا فاطيما يا حبيبتي
أنا اتعلمت درس عمري
أن الله رزق المرأة صوت علشان تستخدمه
في الحالات الي زي دي

انا قررت أفضح الي جابه بعد كده

تعالى يا تيما وخوديني في حضنك أوي
ده أحلى حضن والله :)))

من كل بستان زهرة يقول...

يا استاذ فارس

مش هتفرق في الحالتين دموعك هتنزل

غير معرف يقول...

شي مؤسف فعلاً
لكن معلش..الضربة التي لا تقصم الظهر..تقويه...
حافظي على وظنيتك مهما حصل، فذلك أطهر ما فينا ولا يجب أن نخسره

من صديق قديم