من كام يوم وانا راجعه البيت قابلت عم محمود البواب بتاعنا
ووقفت أرغي معاه شويه
الكلام جاب بعضه ودخلنا في موضوع الريس وصحته
ولقيت عم محمود بيقولي ربنا يرجعهولنا بالسلامة البلد وحشه من غيره
الواحد مبيعرفش قيمة الحاجه غير لما تبعد عنه
" ده على أساس انه كان متعود يشوفوا كل يوم ولا أيه "
أنا طبعا سمعت الكلمتين دول وبرقت ووشي
أحمر وأخضر وأصفر والدنيا لفيت بيه
معقول الي أنا بسمعه ده ليه كده يا عم محمود
ده أنت لسه من يومين كنت قايل كلام زي الفل عليه
" أيوه الفل وأنتم فاهمين طبعا زي أني فل "
وقاعد تشتكي من الحال والعيشه والبلد وان ولادك عايزين يهجوا
كل ده أتمسح في ثانيه علشان الريس راح يعمل عملية مراره
أأأأأأأأأأأأأأأأأأأأاه ياني ده أنا الي مرارتي أتفقعت
" والله ياجماعه أنا عايزاه يقوم بالسلامه كفايه أنه مسلم "
بس ده ميخلنيش أغير رأي في سياسته وحكمه
بس الظاهر أحنا شعبنا كده
ميعرفش يمشي غير لما يكون في حد دايس على رقبته
وبيمشيه بالكرباج
أحنا شعب عاطفي ياخد فوق دماغه
ويقول حاضر ونعم
أقرب مثال الناس الي كانت معترضه على أراء وفتاوى
فضيلة الشيخ طنطاوي "رحمه الله"
دلوقتي بتقول الله يرحمه الراجل ده ميتعوضش
كان مثال للوسطيه والأعتدال
ايوه الموت بينهى كل العداوات والخلافات
ولكن مش معنى أذكروا محاسن موتاكم
أني أغير مبدئي في الشخص
يعني الشعب المصري ماشي بسياسة
الي نعرفه أحسن من الي منعرفوش
تصدقوا فعلا انا قعدت مع نفسي وفكرت في كلام الراجل البسيط "عم محمود"
وقولت صحيح يمكن يجي يوم علينا فعلا ونقول
فين أيامك يا حسني ولا يوم من أيامك يا غالي
طبعا بعد الي هنشوفه من الي بعده
وفعلا أكتشفت ان الي نعرفه أحسن من الي منعرفوش
ربنا يرجعك لينا ياريسنا بالسلامة
نبوس ايد سيادتك ورجلك كمان
تخليك معانا ياريس عشان
وجودك ضروره فرضها الزمان
ومن غير وجودك حقيقي نضيع
هناك 6 تعليقات:
تعليق اول
احنا كدة شعب اتعود يتحم بالحديد والنار
اتعود يمشى جنب الحيطة
ومعتمد على نظريتين
الى يجوز امى أقولة ياعمى
وان كان لك عند الهوهو حاجة قولق ياسيدى
تحياتى لكى ياجميلة
إمرأه من ثلج
انت لخصتي الي جوايه في كلمتين
فعلا شعبنا كده بس ان شاء الله هنتغير
والبلد هتتغير
مبسوطه أوي انك دايما بتنوريني يا جميله
تحياتي لكي يا فاطومه
الناس ملهية فى لقمة العيش والاسعار اللى كل تولع
محدش فاضى للسياسة وناسها
رغم الالهاء دة سياسة حكومة عشان تلهى الشعب وتهبل هيا براحتها
مع خالص تحياتى
أستاذ تامر الشديد
عندك حق الحكومه عرفت تلهي الناس صح
وكل لما الناس تفكر في السياسه تلاقي
موضوع ظهر من تحت الأرض علشان يلهي الناس
بس برده دايما في أمل
أنا سعيده بأنك دايما منورني
تحياتي ليك
" والله ياجماعه أنا عايزاه يقوم بالسلامه
كفايه أنه مسلم "..
وهو لو مش مسلم منتمناش له السلامة..!!
مجرد تساؤل .
هند
انت فهمتي كلامي غلط
انا لو في حد من غير ديني بس انسان بيتقي الله
هتمناه الخير ليه
البابا شنوده مثلا لما بسمع انه سافر للعلاج
بتمنى انه يرجع بالسلامه
كل الي بسمعه عنه والي بشوفه في حواراته
يدل انه انسان جميل
لكن انا لما قولت " والله ياجماعه أنا عايزاه يقوم بالسلامه
كفايه أنه مسلم "..
كنت بدور للشخص ده على حاجه كويسه
اتمناله بيها السلامه
وللأسف ملقتش غير أنه مسلم
حاجه واحده تربطني بيه وتخليني اتمناله السلامه
عموما ياريت تكوني فهمتي قصدي
وانا سعيده أنك نورتي مدونتي
وأتمنى أشوفك دايما
إرسال تعليق