الخميس، 1 أبريل 2010

مازال حبك محنتي وعذابي


أمتى هترجع تاني ؟؟

غابت كتير أوي عننا .....حاسه انها وحشتني أوي

أمتى هترجع بلدي بعزتها وكرامتها وشهامة أولادها 

قلبي وجعني خلاص

كل ما أروح مكان مبسمعش غير شكوى من البلد

"ظلم / رشوة / سرقه / أهانة / تلوث "
الفساد غطى البلد كلها 

حكام ومسئولين ووزراء كلهم طغاة وفاسدين
سرقوا أجمل ما فيها وسرقوا أجمل ما فينا أحنا كمان

سرقوا كرامتنا نخوتنا أحساسنا ببعضنا

بلدنا بقت مستباحة لكل شخص يتاجر فيها زي ما هو عايز
كل مزاد تروح فيه تلاقي مصر أول واحده بتتباع

باعوا أرضنا 

معقول بلدنا فاتحة أحضنها للغرب ..واحنا فيها ومابينا وبينها حدود كتير

عماله ترمي فينا شمال ويمين
 حاسه انه فاضيه بيه خلاص

مش متخيله ان مصر ضاقت بأولادها


بس أرجع وأقول لنفسي ......في أمل

ولكن رغم أنطفاء الحلم بين عيوننا
سيعود فجرك بعد طول غيابي

أنا متأكده ان بلدي هترجع درة الأوطان

أيوه محتاجه شويه جهد وتعب بس هترجع تاني 

لأنها لازم ترجع

لازم ترجع علشان الأمة العربية كلها ترجع 

أنا مقتنعه انه لما مصر هترجع والمصريين يفوقوا

من الغفلة الي هما فيها وينفضوا التراب الي على رأسهم
كل الوطن العربي هيقف واقفة جاده ضد الفساد

ووقتها هنرجع تاني أفضل بلاد العالم

مش عايزين نسجل وجودنا في الحياة بالدعاء بس 

أيوه هو مهم بس الأهم هو الحل العملي
هو ده الي ربنا هيسألنا عنه

وقتها بس هنقدر نحقق حلمنا الكبير

تحرير فلسطين


لازم كلنا نسعى وراء التغيير

لو عايزين تعليم محترم لأولادنا
مستشفيات نظيفه نتعالج فيها
شغل من غير وسطة
 تدخل قسم شرطة وتتعامل بأدميه
تخلص من الرشوه والفساد
يتغير قانون الطوارئ
يكون ليك قيمة داخل وخارج بلدك

مصر ترجعلها مكانتها تاني في العالم

خليك ايجابي 
وكن مع التغيير
غير نفسك الأول
وبعدين الي حوليك
أوعى تقول هي جت عليه ...أيوه جت عليك

مصر لازم ترجع تاني


ملاحظه:
الموقع ده للتوقيع على بيان د/ البرادعي المطالب بتغيير الدستور

www.taghyeer.net

مش لازم تكون مؤيد للبرادعي للرئاسة 2011
مش لازم هو يكون رئيس بلدنا 
أحنا عايزين التغيير أولا
وبعدين نختار رئيسنا بنفسنا

هناك 16 تعليقًا:

Unknown يقول...

مهما طال الليل علينا بكرة جاي
مهما زاد الجرح فينا القلب حي
مهما طالت السنين مهما زاد فينا الانين
في الضلام عشنا يومين بس بكرة جاي بضي
مهما طال الليل علينا بكرة جاي


ان شاء الله مصر هترجع
وبعدين ده الزمالك رجع تاني
يبقي مصر مش هترجع ؟؟؟؟

إمرأه من ثلج يقول...

حبيبتى أزيك وحشانى

فعلا مصر ممكن تتغير وترجع تانى درة الوطن العربى لا والعالم
بس لما نتغير ونسعى للتغير مش نستنا الفرج ولما نتغير هتختفى الرشوة والنفاق والكوسة وغيرها
هنرفض الظلم وامتهان الكرامة

تحياتى

Tamer Nabil Moussa يقول...

ازيك زهرة

اخبارك اية

بلدنا حلوة بس بعض المشبهون يؤثرون على صورتها الجميلة واكيد مش دايمة ليهم والحال السيىء دة فى طريقة للزوال

ربنا معانا وتصحى العرب وتخد موقف صح وايجابى تجاة قضية فلسطين

مع خالص تحياتى

من كل بستان زهرة يقول...

انسان عادي

كلماتك ساحره
بتفتح طريق الأمل لكل يائس

يارب مصر ترجع

أما بقى بخصوص الزمالك
انا زمالكويه جداااااااااااا
وبقولك بقى وبكل ثقه
الزمالك عاد لينتقم

نورتني يا شاعرنا الهمام

من كل بستان زهرة يقول...

فاطومه أختي الصغيرة الجميله
انت وحشاني أكتر

لازم مصر تتغير لما يكون فيها شباب زي الورد زيك

عارف طريقه وعارف انه هو المستقبل لبلده

عارفه يا فاطمه لو كلنا عندنا الفكر بتاعك

بلدنا دي هتبقى أحلى بلاد الدنيا

تحياتي ليكي
ودايما معايه

من كل بستان زهرة يقول...

المؤلف الرائع تامر الشديد

أيه اخبارك؟ يارب بخير

فعلا لو شويه المشبوهين دول يختفوا بقى

انا عارفه ان الظلمه طولت شويه بس فعلا على رأيك

عمرها ما هتدوم ليهم

يارب يكون زمانا أحنا الي تتحرر فيه فلسطين

تحياتي ليك

سمع هوص (Abo 3li) يقول...

ان شاء الله مصر هترجع بينا ولينا...
تحياتي

NaiRa يقول...

حبيبتى اولا نايس بوست جدا
وعجبنى اوى فيه اتهاضك للبلد وحنانك ومسامحتك ليها والامل اللى فيكى جدا
بس عاوزه اقولك حاجه احنا يمكن صح كل واحد بيقول يلا نفسى
بس لازما لبلد هى اللى تبدأ الاول
الناس مش هيتغيرو الا لما يلاقو الاحسن لان كل واحد شايل هموم فوق راسو اللى بيقولك مرتبى وهيكفينى ازاى واللى بتجرى ورا معاش المرحوم اللى اصلا مات من الجوع
والاب والام اللى انفصلو وسابو ولادهم الزمن يبهدل فيهم
كل ده لازم يتغير علشان البنادم كمان يحس انه فى امل ويقدر يتغير
واكيد كل واحد فينا رأيه مكمل للتانى

اختلاف الرأى لا يفسد للود قضيه

دايما يا حبيبت قلبى بوستاتك حلوه كده
ودايما متميزه
تقبلى مرورى
NaiRa

من كل بستان زهرة يقول...

أبو على

ان شاء الله مصر راجعه وهتكون أحسن من الأول كمان

ان شاء الله ترجع بينا

تحياتي لمرورك

من كل بستان زهرة يقول...

نينو
أخبارك ايه يا جميله؟

أكيد اختلاف الرأي لا يفسد للود قضيه

بس البلد هتبدأ أزاي

ما أحنا الي لازم نغير فكرنا وسلبيتنا
الأول

ونغير الحكام والمسئولين عننا

هو أكيد في ناس زي الي انت قولتي عليهم مفيش في أيدهم حاجه علشان كفايه الهم الي على رأسهم

بس في مجموعة تانيه لازم هي الي تتغير الأول

أتمنى اننا نكون منهم

وأكيد اختلاف الرأي لا يفسد للود قضيه

أحب أسمع الأراء الأخرى علشان أوسع مداركي

ميرسي لمرورك الجميل
دايما مع بعض ان شاء الله

أحمد الصعيدي يقول...

ستعود ان شاء الله

ولكن اعلمي أن عودتها هذه المرة ليست بعيدة عن أحداث النهاية

فلنبدأ بمن نعول

دوما أتمني أن يسعدك الله


السلام عليكم

شريهان يقول...

بردو بردو بردو

ممكن نقول ان فى حاجات كويسة مش كل وحش وياريت تبصى للنص المليان من الكوباية عشان نتفاءل للاحسن وبعدين بقى احنا جيران انا كمان من المعادى
يا جميل

من كل بستان زهرة يقول...

الشاعر البديع أحمد الصعيدي

ان شاء الله تعود
انا كمان عندي أحساس ان وقت التغيير
مبقاش بعيد

ولرب نازلةٍ يضيق لها الفتى ......
ذرعاً وعند الله منها المخرج
ضاقت فلما استحكمت حلقاتها ......
فرجت وكنت أظنها لا تفرج




تحياتي لك ولمرورك الرائع

من كل بستان زهرة يقول...

شيرو
ايه أخبارك؟

والله يا شيرو النص المليان خلاص مبقاش نص

بقى ربع بس

خايف بكره أصحى الآقي الكوبايه اتكسرت خالص

في حاجات حلوه في بلدنا
لا بلدنا كلها حلوه...بس الفاسدين الي فيها

غيروا نظرتنا لكل شئ حلو
لازم طبعا نشوف الكويس ونحافظ عليه
طيب والسئ والفساد
لازم طبعا نحارب علشان نصلحه


بس أحلى حاجه بقى اننا جيران
المعادي دي أحلى مكان في الدنيا وأكيد كل الي فيها حلوين

نورتيني يا جميله

إمرأه من ثلج يقول...

حبيبتى
سلامتك مالك ان شاء الله تكونى بخير

بجد قلقت عليكى
وانا والله بستنى تعليقك من بوست لبوست علشان اطمن عليكى

بحبك فى اللة

من كل بستان زهرة يقول...

فاطومه
وانا كمان بحبك في الله
انا كده لازم كل نهاية شتاء أرقد في السرير
يومين ثلاثة
دور برد بس من الي بيموت
وطبعا زود عليه أكلت الفسيخ الجامده يوم شم النسيم

بس الحمد لله بقيت كويسه

ياحبيبتي انا بجد خلاص حاسه انك أختي الصغيره وقريبه مني أوي
يارب دايما مع بعض
طمنيني عليك يا جميله