السبت، 5 فبراير 2011

يارب تمطر طوب




يارب تمطر طوب على العيال في التحرير
الدعوه دي سمعتها النهارده من واحده ماشيه في الشارع
ست كبيره وشكلها من الطبقه الفقيره
حسيت أنها بتتهمنا أننا السبب في الغلب الي هي فيه
وأننا السبب في أنها مش لآقيه تاكل
حسيت وقتها بإحباط شديد
حسيت أن بهدلت الأيام الي فاتت
والي كنت بقول فيها لنفسي كله يهون علشان بلدي
حسيت وقتها أن ده كله ضاع هدر
وحسيت أن في نسبة كبيرة من الشعب ده
خســـــــــــــــــــــــــارة فيه
كل نقطة دم والبهدلة الي أتعملت علشانهم

دلوقتي وبأعلى صوت أنا الي بقول للشباب في التحرير
أنا كنت وسطكم بس أنا رجعت بيتي
 وياريت أنتم كمان تمشوا وترجعوا لبيوتكم
في أحضان أمهاتكم وتناموا تحت بطاطينكم
لأنكم بجد خسارة في الشعب ده
لأنه شعب كلمة توديه وكلمة تجيبه
أرجعوا لأن دمكم الي هيسيل مش هيكون ليه أي ثمن
وهتطلعوا في الأخر شباب متهور وعايز يخرب البلد


وبقول للطاغيه مبارك 
خليك معانا
والنبي أوعى تمشي يا أخي
خليك معانا 
على قلبنا طول العمر
أنت تستاهلنا وأحنا منستهلش غيرك
خليك معانا 
لأننا من غيرك هنضيع ونجوع 
ومش هنعرف للأمان طريق

وبقول للشعب التونسي تحية كبيره أوي ليكم
علشان أنتم فعلا الأبطال الحقيقيين 
صمدتم شهرا كاملا على قلب رجل واحد وحققتم ما تمنيتم

وأخيرا
بقول لكل شهيد سقط مننا الأيام الماضية
أنا أسفـــــــــــــــــه جدا
لأنك مت وضحيت بنفسك علشان الشعب ده


هناك 16 تعليقًا:

NaiRa يقول...

اولا يا زهره
انا نفسى كنت بدعى الدعوه دى
وبقول يارب تمطر نار عليهم علشان يتلموا بقى
انتى همك بس اللى واقفين؟
مش همك ان الاجانب اللى شمتانين فينا فى وسطهم
مش همك البلد اللى بتخرب اكتر واكتر
مش همك انا الناس مصالحها واقفه ومفيش شغل والاكل اسعاره بقت نار اكتر ماهو
ومفيش الا الخراب؟
دلوقتى ولا بنتكلم عن مبارك ولا عن غيرو
احنا بنتكلم بقى فى الشعب اللى احنا منوا
زى انتى ما روحتى بيتك هم بقى كمان يتلموا ويروحوا عشان نعرف فين الايد اللى اتمدت من بره وبتلعب
كفايه خراب وقررررررررف
البلد خربت ومفيش غير القرف حوالينا
ربنا يستر بقى عشان بجد انا تعبت وقرفت وفااااااااااااض بيا الوالد كل يوم حاله يدمر ومصالحه بتوقف

عبد الرؤوف بن عبدالسلام (أبوهارون) يقول...

الصر يا رب من عندك

ندى نصر يقول...

مع الأسف استطاع الإعلام المصري الكاذب المزيف للحقائق أن يستغل سذاجة البسطاء من الشعب المصري ويقنعهم بأباطيله..ولكن بالتأكيد سيصمد شباب التحرير لأن الله معهم وهم مؤيدون بجنود الله وبإذن الله بعد رحيل الظالمين عن تلك الأرض الطاهرة سيعرف هؤلاء البسطاء قيمة التضحية من أجل الحرية ونيل الكرامة..لو أن كل واحد منا لم يفكر إلا في نفسه فقط وفي مصلحته فقط ونسي أنه جزء من هذا الوطن إذن فنحن لا نستحق العيش بحرية وكرامة والأيام القادمة ستثبت لنا جميعاً إن كنا نستحق أو لا نستحق..

سعدت بزيارة مدونتك..

فارس عبدالفتاح يقول...

هؤلاء الحمقى والمغفلين والجهلاء وممن يدعي الحكمة وممن يدعي انه يملك الحقيقة المطلقة .

دول عيزين يتحطوا في مركب ويتولع بيهم في وسط البحر يعني اللي ينفد من الحرق يموت غرقان هذا اقل ما يستحقوه .

мαησηα يقول...

لا حول ولا قوة الا بالله عارفة انا امبارح اقسم بالله عيطت من اللى شوفته ف التليفزيون المصرى

مش ضعف اقسم بالله مش ضعف منى ولا انى بنت خايبة وبعيط من اى حاجة انا عيطت لان للدرجة دى احنا هاينين على اهلنا

للدرجة دى بقه الاستعباد بيمشى ف دم اهلنا

طيب لما اولادى يكبروا هاقولهم ايه جدودكم مكانش عاجبهم

اقولهم خيرى رمضان وكل العواجيز اللى جابهم بيقولونا بعلو حسهم ثورة ايه انتوا اتجننتوا احنا منعرفش غير ثورة 52 يارب

يارب بجد محتاجينك تقف معانا

ربنا يهدى يا حبيبتى يارب وينصرنا ع القوم الظالمين

فاتيما يقول...

يا زهرة يا حبيبتى
اثبتى

انا هسألك سؤال وعاوزة اجابة محددة

انتى نزلتى عشان مين ؟

مصر
ولا عشان حد يقولك شكراً

من قبل ما تجاوبى
عشان مصر ..انا واثقة
محدش ينزل يضحى بروحه ..عشان حاجة تانية غير انه عنده مبدأ ومقتنع بيه لدرجة الشهادة ...

الناس
انتى عارفة
عمرهم ما بيتفقوا
دول اختلفوا على رب العالمين
مش هيختلفوا على البشر اللى زيهم؟!!

لو على المؤيدين او القلة المندسة اللى هما بيساندوا موقفك ..فهم كثر يا حبيبتى وتعالى عندى هتلاقيهم افواجا افواجا والله
بيبوسوا التراب اللى مشيتوا عليه ونزفتوا ...
صدقينى الحكاية حكاية وقت
مش اكتر
انقشاع الغيام وظهور الحقيقة
اثبتى شوية بس لحد ما الحقيقة تبان
دا طاغية بنتزع من طغيانه وغيه
الحكايو مش بالساهل واستخدام كل الاسلحة بالنسباله مشروع ..بما فيها الخسة و العهر الاعلامى ...وكان متوقعا
اللى مكنش متوقع ..ان الضربة تيجى من الناس اللى حواليكى
بس حتى دا مقبول
دول عندهم مخاوف اكتر منك
لأن معندهموش ايمان بشىء
ثقتهم ف روحهم حتى صفر
واللى انعمل هزهم قوى
اكتر ما زلزك انتى


اثبتى يا زهرة
نصر الله قريب يا حبيبتى
وبعدين بمناسبة تونس بقى
اخويا بيقولى ..العيال الأجندة بتوع الفيس بوك بيقولوا ..هيوه احنا لو غلبنا الامن هنقابل تونس ف النهائى ؟

:)

روقى يا حبيبتى
واقرى الكلمات دى بقلبك قوى



وَلَنَبْلُوَنَّكُمْ بِشَيْءٍ مِّنَ الْخَوْفْ وَالْجُوعِ وَنَقْصٍ مِّنَ الأَمْوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ

eng_semsem يقول...

اولا تحيه كبيره على ما فعلتيه الايام الماضه وان احسست بالتعب استريحي فهناك من سيكمل الى نهاية خروج الطاغيه واملاي قلبك يقينا لابد من وجود اشخاص منتفعين من وجود حسني مبارك وهناك جنود له يقفون في وسط الشارع يغنوا اغاني بايخه على الناس عن طريق الاعلام المرتبات وقفت هاكل منين طيب ما طول عمرهم بياكلوا تراب لما الناس وقفت عشان يعرفوا طعم اللحمه حسني فهمهم انهم بعد كده مش هيلاقوا التراب.
ارجعي البيت واتفرجي على المنظر من بعيد هتلاقي نفسك بترجعي لوحدك وانت اللي هتجيبي حق الشهيد

من كل بستان زهرة يقول...

نيره
للأسف اني بكرر خساره اي نقطة دم نزلت من اي شهيد او جريح في هذا الشعب

ولكن انا دلوقتي نازله عارفه ليه
علشان انهارده يوم للشهداء الأبطال
وكمان لقيت ناس حقيقيين عارفين قيمة الحلم الي اتحقق هما كمان لسه ثابتيين
نازله لأن كل العاقليين الي حوليه
نازلين معايه وبيشجعوني
واتمنى ان فكرك يتغير عن هذا الطاغيه

من كل بستان زهرة يقول...

ادعي لنا يا رؤوف
يارب الصبر والثبات

من كل بستان زهرة يقول...

ندى
اعلام سافر
وللأسف استطاعوا ان يلعبوا على نغمة الحاجه للناس الفقراء
ربنا ينتقم منهم

ربنا يثبتنا وينصرنا

من كل بستان زهرة يقول...

أ / فارس
يااااريت
وكل النظام الفاسد معاهم وعلى رأسهم الطاغيه مبارك

من كل بستان زهرة يقول...

مانونا
مش لوحدك الي بكيتي
انا كمان امبارح كنت منهاره
حسيت بإحباط وخيبة امل غريبه
يااااااااااااااه
كل الي خرج في المظاهرات دي مكنش عايز حاجه شخصيه كله عايز يطهر بلده من الفساد علشان خاطر كل المصريين اخواته
ولكن بعضهم للأسف
بدل ما يشجعنا بيتهمنا بالخيانه والتدمير
ربنا المنتقم يا حبيبتي
وان شاء الله اولادك يكبروا بعد ما نكون صنعنا ليهم بلد عظيمه يفخرونا بها

من كل بستان زهرة يقول...

عارفه يا فطومه
انا دلوقتي حاسه بقهر عمري في حياتي محسيته ولا كنت اتخيل اني اعيشه

انا بحب بلدي اوي
عارفه انا كنت عايشه في السعوديه
لما كان حد يحب يشتمني كان يقولي يا مصريه
شوفتي الظالم مبارك وصلنا لأيه
ان جنسيتنا عار
دلوقتي كل العالم العربي بيفخر بينا

ماعدا اهل بلدنا بيتهمونا بالخيانه والتخريب
كل الي حواليه
بيقولي نفس كلامك لازم نثبت
ما ضاع حق وراءه مطالب
ربنا يثبتنا


بس تتوقعي مين الي هيكسب في النهائي احنا ولا تونس؟؟؟؟؟؟؟؟

فطومه ربنا يبارك فيكي
عارفه انا هنزل والي يحصل يحصل
من الصبح التليفونات مبطلتش كله بيتفق معايه اننا ننزل
ولكن انا كنت بحبيطهم
بس خلاااااااااااااص هنزل

من كل بستان زهرة يقول...

م / سمسم
لأ هنزل عارف ليه علشان
على رأي الرائعه فاتيما انا مش بعمل كده علشان الناس تقولي شكرا
انا بعمل كده علشان بلدي
بلدي الي لازم ترجع احلى الأوطان

ولازم الطاغيه ده يرحل
ربنا يثبتنا جميعا

Carmen يقول...

علي فكرة نفس الموقف ده شفته بعيني وشفت ناس كتير متضررة عشان كده بنادي بعلو صوتي كفاااااية في ناس لو ماشتغلتش النهاردة ماتكلش بكرة
يارب اهدينا واهديهم

abdullah-blogs يقول...

This is such a nice addition thanks!!!

شات صوتي
كول
عرب كول
شات مغربي
انحراف كام
شات عربي
عرب كول

غلا الروح
شات الغلا
غلا روحي
شات صوتي
شات الغلا
الغلا
شوق كام
شات صوتي شوق

شات صوتي
شات عذاب
عذاب كول
عذاب كام
شات كام
شوق كام
شات صوتي شوق
شات كول
شات صوتي

شات الغلا الرقمي
شات عذاب كول الرقمي
شات عرب كول الرقمي

مدونة غلا الروح
شات الغلا
شات صوتي
الغلا

ـــــــــــــــــ
شات تواعدنا
شات صبايا الشام
شات غلا روحي
مدونة غلا الروح